Гъябгъюрайи йисан аьхириз Дагъустандин 66 мектеб бицIидар гъахру цIийи машинарихъди тямин апIиди. Машинар республикайин мектебариз федералин дакьатарихъ масу гъадагънайидар ву.
Къайд апIуз ккундучуз, 2020-пи йисан мектебар автобусарихъди тямин апIури кьюбпи раж ву. Гьаму йисан сентябрин вазлира республикайин бюджетдин дакьатарихъ мектебариз 25 автобус масу гъадагънийи.
Гьамус автобусар урхурайидар сабпи ражари вуди машиндиъди хувал тешкил дапIнайи мектебариз жара апIиди, фицики улихьна йисари автобусар айи мектебарин вари машинар цIийидарихъди гьюдюхна. Мектебариъ йицIуд йистIан артухъ лихурайи автобусар цIийидарихъди гьюдюхбан гьякьнаан вуйи РФ-дин Президент Владимир Путиндин табшуругъ тамам апIуз хъюгъю сабпи регионарин арайиъ Дагъустанра а. Гьаци, РД-йин образованиейинна илимдин министерствойи 2018-пи йисан – 140, хъа 2019-пи йисан – 165 мектебдин цIийи автотранспорт масу гъадабгъну.
«Аьхиримжи шубуд йисандин арайиъ ухьу мектебариз 396 автобус масу гъадагъунхьа. Улихьна йисари затра транспорт адру мектебар цIийи машинарихъди тямин дапIна, баяр-шубар машинариъди мектебариз ва мектебдин дарсарин кьяляхъ хулариз гъахбан къайда мюгькамди ккабалгна. Му цирклиъ ляхин давам хьибди», – къайд гъапIну вахтназ вуди РД-йин гьюкуматдин председателин заместителин вазифйир тамам апIурайи РД-йин образованиейинна илимдин министр Уммупазиль Уьмаровайи.
Къайд апIуб лазим вуки, мектебариз автотранспорт муниципалитетари заявкйир тувбиинди масу гъадагъура. Машинар мектебариз жара апIру вахтна, асас вуди баяр-шубар мектебдихьан ярхла яшамиш шулайивалин манзил гьисабназ гъадабгъура.
Зиихъ учу улупнайи кьадарнакан йисандин аьхириз 2 автобус Хив райондиз (Ургъа ва ГъванцIил гъуларин мектебариз), хъа 5 автобус Табасаран райондиз жара дапIна.
Табасаран райондин образованиейин управлениейин кIулиъ айи Аьбдусалам Гьясановди туву мялуматариинди, РД-йин образованиейин министерствойихьан дурари 23-пи декабри цIийи автобусарин гьякьнаан кьабул дапIнайи къарар гъадабгъну. Дидиъ райондин мектебариз хьуб автобус жара апIурайиваликан дупна. Сентябрин вазлиъ саб машин Бургьанкент гъулан мектебдиз жара дапIнайи. Гьамус ТIивак, ТIаттил, Гурихъ, ТIюрягъ ва Хянягъ гъуларин мектебари сабпи ражари вуди автотранспорт гъадабгъну. Автобусар улубкьурайи ЦIийи йисан, му мектебаризси, душвариъ урхурайи баяр-шубаризра аьхю пешкеш гъабхьну.
