Яв баяр, Табасаран
Улихьна йигъари «Табасарандин нурар» газатдин редакцияйиз Урусатдин Яракьлу Кьувватарин жергйириъ гъуллугъ апIурайи ихь ватанагьли, Табасаран райондин ТIивак гъулан агьали, Урусатдин Федерацияйин оборонайин министерствойин тямин апIбан взводдин аьхюну прапорщик Юсуф Мягьямедялиев кагьзиинди илтIикIну.
Юсуф Мягьямедялиевди хъадапIнайи кагъзик дибикIнайиганси, 2020-пи йисан мартдин вазлиъ гизаф гъуллугъар гьуркIру, йишвлан йишв’ина гъабхру госпиталари ляхин апIуз хъюгъхъан мина РФ-дин оборонайи министерствойин дахилнаъ айи кьушмариъ гъуллугъ апIурайи эскрари думу госпиталариъ коронавирусдин уьзур киву аьдати касар сагъ апIура.
«Гьаму гъябгъюрайи йисан майдин вазлиъ, РФ-дин оборонайин министерствойи Дагъустандин Буйнагъск шагьриъ военный госпиталь гьязур гъапIхъан мина, 100 касдиз дахъру йишвар айи йишвлан йишв’ина гъабхру госпиталин начальникди дерккур ихь ватанагьли, Табасаран райондин Лижва гъул’ан вуйи Аьбдулмежид Мягьямедов ву. Думу подполковникдин звание ади лихурайи военный духтир ву», – дибикIна прапорщик Юсуф Мягьямедялиевди.
Аьбдулмежид Мягьямедов кIулиъ ади, ужудар военный духтрарин бригада Буйнагъскдиан Астрахань шагьриз, янаки гьадушваъ яратмиш дапIнайи йишвлан йишв’ина гъабхру госпитализ гьаъну.
«Аьбдулмежид Мягьямедович, ужур начальник ва заан пишекарвал айи духтурси, гизаф адмивал кайи, аьхю ва ужуб юкIв айи касра ву. Дугъу, узу зиихъ къайд гъапIганси, коронавирусдин уьзрихъди женгнаъ дугъужвну, хайлин касар сагъ гъапIну ва думу ляхин ужудар хъуркьувалариинди давамра апIура.
Буйнагъск ва Астрахань шагьрариъ учу варжариинди инсанар сагъ гъапIунча. Ихь республикайиъ коронавирусдин тIягъюн яцIаъ айи вахтна намуслу ляхин апIбаз лигну, Дагъустан Республикайин улихьдин Глава Владимир Васильевдин къарарнииндиАьбдулмежид Мягьямедовдиз «Зегьметнан дирбаш’вализ лигну» медальра тувну. Гьамусяаьт вари бригадайиинди Абхазияйиъ ляхин давам апIурача. Гьадушваъра коронавирус кади гъагъиди иццурайи хайлин касар а», – ккудубкIура чан кагъаз Юсуф Мягьямедялиевди.
Ихь ватанагьлийин кагъзиан мялум шулайиганси, гьамусяаьт му духтрари Абхазияйиъ коронавирусдин уьзрихьан инсанар сагъ апIура. Дурар Абхазияйиз 17-пи октябриъ гьаъну ва 20-пи октябрихъан Сухум шагьрин «Айтар» пансионатдиъ 100 кас кьабул апIуз гьатIабццнайи йишвлан йишв’ина гъабхру госпиталиъ коронавирусдин уьзур кайивал тасдикь дапIнайи сабпи аьзарлуйир сагъ апIуз хъюгъну.
Октябрин 22-диъ Абхазияйин премьер-министр Александр Анкваб РФ-дин оборонайин министерствойин военный йишвлан йишв’ина гъабхру госпиталин начальник Аьбдулмежид Мягьямедовдихъди гюрюшмиш гъахьну (шиклиъ).
Гюрюш ккебгъри, Александр Анквабди Абхазияйиз коронавирусдихъди женг гъабхуз кюмек ккун гъапIган, гьяракатниинди военный духтрар гьаъбаз, РФ-дин оборонайин министр Сергей Шойгуйиз ва госпиталин вари гъуллугъчйириз Абхазияйин улихь-кIулихь хьайидарин терефнаан чухсагъул мялум гъапIну.
Гьацира дугъу мина дуфнайи военный духтрарин бригадайиз чпин республикайин терефнаан лазим вуйи кюмек апIуз гьязур вуйиваликанра гъапну.
Ляхин ужуди тамам апIбаз лигну, Абхазияйиъ айи урусатдин ватандашарин тешкилатарин ляхин дюзди гъюруганси албагру союздин кIулиъ айи Олег Юрченкойи 28 ноябриъ, Абхазияйиъ коронавирус уьзрихъди женгнаъ гъахьи йишвлан йишв’ина гъабхру госпиталин начальник Аьбдулмежид Мягьямедов кIулиъ ади, Урусатдин военный медицинайин 101 пишекар чухсагъул мялум апIбан кагъзарихъди, дипломарихъди ва грамотйирихъди лишанлу гъапIну. Гьелелиг дурари чпин пишекарвалин ляхин Абхазияйиъ давам апIури ими.
