Мялум вуйиганси, 2-пи январиъ йишвну Кьибла Дагъустандиъ жилар гъутIурччвувалин натижайиъ Акъа гъулан мектебдиз аьхю зарар гъабхьну, дидин вари классарин цалар гъутIуркIну. Акъа гъулан мектеб швнуд-сад йис улихьна аварийный гьялнаъ айибси гьисаб дапIнайи, гьаци вушра, мектеб хътрябкьбан бадали, жизби расвалин ляхнар кIули гъахури, цIийи мектеб апIуз проектдик кипайиз, дидин уьмур ярхи апIурайи.
6-пи январиъ Табасаран райондин администрацияйин глава Мягьямед Къурбановди Хючнаарин сабпи нумрайин лицейин, Табасаран райондин гимназияйин ва ЦIурутIларин мектебдин директорар чан кабинетдиъ уч гъапIнийи ва Акъа гъулан кьялан мектебдиъ урхурайидариз кюмек апIбан месэла гъитIибккнийи. Директорари чпин мектебар Акъа гъулан мектебдиъ урхурайи бицIидар кьабул апIуз гьязур вуйиваликан, бицIидар хуз кюмек вуди чпин автобусарра тувруваликан гъапнийи. Совещаниейиъ иштирак гъахьи Акъа гъулан мектебдин директор Аьлириза Рамазановди жара теклиф адабгъну – Акъа гъулаъ айи сар касдин хулариъ вахтназ вуди мектеб тешкил апIуб, гьаз гъапиш абйир-бабар чпин бицIидар жара йишвариз гьауз рази гъахьундар.
7-пи январиъ Табасаран райондиз чан дахилнаъ вахтназ вуди РД-йин образованиейин ва илимдин министрин вазифйир тамам апIурайи Уммупазиль Уьмарова, РД-йин тикилишчивалин ва ЖКХ-йин министрин 1-пи заместитель Мурад Аьлиев, «Республикайин жилар тIурччвбан центр» РД-йин ГАУ-йин гъуллугъчйир айи делегация гьафнийи. Табасаран райондин глава Мягьямед Къурбановди дурар Акъа гъулан мектебдиз лигуз хъади гъафнийи. Дуфнайи делегация-йин вакилар мектебдин айитI идицну ва дубхьнайи зарарназ кьимат тувну. Дурар вари саб мясляаьтнахъна гъафну – мектебдиъ сарун дарсар кивуз шулдар, гьаддиз думу хъябкьну ккунду.
– Гьамусяаьт варитIан важиблу месэла – бицIидар хатIалу йишвхьан ярхла апIувал, гьацира мектебдиъ урхурайидар вахтниинди дарсариз гъягъюз гъитувал ву. БицIидар автобусариъди гъахурушра, дюзди гъюрадар. БицIидариз дарсар кивру йишвар гъулан айитI албагиш, варитIан ужу шулу. Мектебдин бицIидар кьабул апIуз гьязур дапIнайи хулар цIийиди тикмиш дапIнайидар ву. Душваъ саб-швнуб хал а, хъа вушра 3 сменайиъ дарсар кивувал алабхъура, гьаз гъапиш му мектебдиъ 17 класс-комплект а, – гъапну Уммупазиль Уьмаровайи.
Министр Акъа гъулан мектебдин мялимарихъди гюрюшмиш гъахьну ва дурарихьан сарун фицдар чарасуз гьял дапIну ккуни месэлйир аш, гьерхну. Сабпи классдиз дарсар киврайи Сейраханум Ражабовайи абйир-бабарин терефнаан саб тIалаб айиваликан мялум гъапIнийи. «Ич мектебдиз багахь хьайи Дагъни гъулан бицIидарра гъюра, дурар чпин абйир-бабари хъади гъюри шулу, гьаддиз ич мектебдиз саб автобус тувуб тIалаб апIурача», – ккун гъапIнийи дугъу.
Уммупазиль Уьмаровайи, думу месэла багарихьди гьял апIидихьа кIури, гаф тувну.
– ЦIийи мектеб тикмиш апIбан бадали, саб гектар жил лазим ву, хъа ухьухь гизафси жилар гъулан мяишатдин ясана ярквран мяишатдин ликрихъ хъайидар ву, думу жилариин мектебар тикмиш апIуз ихтияр адар. Хючна гъулан советди улупнайи жил вахтниинди, РД-йин Правительствойин кюмекниинди тикилишчивалин ляхнар гъахуз шлу жюрейин жилариз адауз удукьиш, цIийи мектеб тикмиш апIбан бадали, саб вазлин арайиъ лазим вуйи вари документар гьязур дапIну тувуз шулу. Табасаран райондиъ 58 мектеб а. Кьюд йисандин арайиъ, «100» мектеб кIуру проектдиъ иштирак духьну, 30 мектеб рас дапIна. 2021-пи йисан, гьаму Акъа гъулаъ айи мектебарсдар 12 аварийный гьялнаъ айи мектебар ктарди, имбу мектебарра рас апIиди, – гъапнйи чан улхбаъ Мягьямед Къурбановди.
12-пи январиъ Акъа гъулан мектебдиз РЕН ТВ-йиан ва 5-пи каналиан, гьацира «Известия» мультимедийный мялуматарин центриан хялар гъафну. Жилар тIурччвбан кьяляхъ мектеб фициб гьялнахъна дуфнаш, дурарра гъилигну. Райондин образование-йин управлениейин начальник Аьбдусалам Гьясановди дурариз мектебдин гьялнакан ктибтну.
Телевиденийиан дуфнайи хялари мектебдин директор Аьлириза Рамазановдизра хайлин суалар тувну. Дугъу хялариз мектебдин вари дутIуркIнайи йишвар улупну, ва мушваз бицIидар деетуз лап хатIа айиваликан, гьаддиз урхурайидариз цIийиди дапIнайи хусуси хулариъ (шиклиъ) дарсар кивуз хъюгъну айиваликан гъапнийи. Акъа гъулан ва ЦIурутIларин мялимарин коллективари, хусуси хуларикк албагнайи мектебдиз саб бицIи вахтнан арайиъ газ гъизигну, отоплениейин батарейкйир кивну, раккнар гъивну, цалар гьязур гъапIну, исикк линолеум ккипну, вари классариъ доскйир керхну, столар, кусрийир дивну ва гьяжатханара гьязур гъапIну. Мани хураг гьивру йишвра гьадму хуларин багахь хьайи хулаъ албагна.
ЦIийиди тикмиш дапIнайи футболин бицIи майданра багарихь ерлешмиш дубхьна. Акъа гъулан кьялан мектебдиъ 17 класс-комплектар а, 144 балина шуру урхура, дурарикан 77 бицIири – ккергъбан классариъ.
Телевидениейиан дуфнайи журналистари бицIидариз дапIнайи рягьятвалариз ужуб кьимат дивну.
Акъа гъулан жямяаьт вахт-наз вуди мектеб гъулаъ, хусуси хулариъ тешкил апIбиин рази ву, ва багарихьди му гъулаъра цIийи мектебдин дараматар дивур кIури, умуд кивра.
