Редакцияйин табшуругъ тамам апIури, узу Дербент шагьрин ЦГБ-йиъ духтирди лихурайи эпидемиолог Рустам Рамазановдихъди гюрюшмиш гъахьунза ва шагьриъ вакцина йивувалихъди арайиз дуфнайи аьгьвалатнакан гаф-чIал гъапIунза.
Учу сюгьбат шагьрин Пушкиндин ччвурнахъ хъайи кючейиъ ерлешмиш дубхьнайи поликлиникайиъ ачмиш дапIнайи вакцинайин рубар йивру штабдиъ гъубхунча. Узуз рябкъюри, Рустам Рамазановди (шиклиъ) прививка гъапIнийи, хъасин йиз суалариз жавабар тувнийи.
– Рустам Низамудинович, гъи шагьрин агьалйириз фициб вакцинайин рубар йивуз планламиш дапIначва? Прививка фицдар касари дапIну ккундар?
– Гъи ихь варидарин гьял дапIну ккуни месэла – COVID-19, дидихъди женг гъабхувал ва думу ихь уьмриан терг апIувал ву. Ав, ухьуз мялум вуйиганси, Н.Ф.Гамалейин ччвурнахъ хъайи эпидемиологияйин ва микробиологияйин центри, уьзрин улихьишв бисбан бадали, цIийи «ГамКовидВак», вая «Спутник V» кIуру вакцинйир гьязур гъапIну. «Спутник V» гужли прививкаси гьисаб апIура, думу вакцина ифдик вирус кубчIвуз гъидритру антитела кайиб ву. Хъа жара иццрушин ктарш, агьалйириз йиз терефнаан думу руб йивбан теклиф апIураза. Дидхьан гучI апIбан ляхин адар.
Эгер ичв вакцинайин руб йивуз ният аш, сабпи нубатнаъди учву дуланмиш шулайи райондин участокдин духтрихьна илтIикIуб лазим ву – анализар тувну, жвувак жара иццрушнар кашра лигбан бадали. Хъа гурдмарин, кIван, онкологияйин, сахарный диабет ва жара иццрушнар каш, думу вакцинайин рубар йивуз хай шулдар. Фунуб вушра уьзур ибшри, думу сагъ дарапIди, вакцинайин руб йивуз ихтияр адар…
Гъи Дербент шагьриъ, ифдин анализ тувну, антителарин кьадар аьгъю апIуз шулу.
– Дербент шагьриз хъадаънайи вакцинйирин кьадар ва гьамусяаьт коронавирусдиан иццурайидарин кьадар фукьан ву?
– Гъийин йигъаз шагьриз гьелелиг 240 вакцинатIан хъадаънадар, хъа багарихьди аьхю кьадар хътауз планламиш дапIна. Ковиддиан аьзарлу шулайидарин кьадарнакан улхуруш, думу аьхиримжи вахтна цIиб хьуз хъюгъна. Гьаз гъапиш, инсанар чпира вирус ктрубчIвуз чалишмиш шула, лазим дару йишварихьна гъягъюри имдар. Агьалйири духтрарин тIалабар вари тамам апIури гъахьиш, думу уьзур кайидар шагьриъ багарихьди хъана цIиб хьуз мумкин ву.
Вакцинайин рубар сабпи нубатнаъди МФЦ-йин, банкдин гъуллугъчйириз, дявдин гъуллугънаъ айидариз, шагьрин маршруткйирихъ хъайи шофёрариз ва жара идарйириъ ляхин апIурайидариз йивувал тешкил дапIнача.
Хъа имбу суалариз вакцинайин рубар йивбахъан саб тяйин вахт гъубшиган, жавабар тувдихьа. Гьаз гъапиш рубар гъиву агьалйирин гьял фициб шулуш, дурарин кьадар фукьан гъабхьнуш, багарихьди мялум хьибди.
