Ихь ватанагьлийирин бажаругълувализ ихь юрдарин сяргьятарилан тиндира лайикьлу кьимат туври рябкъруган, гьелбетда, кIваз хуш шулу. Гьациб дюшюш вуди, «Литературайин Таврия» ччвур алди Москвайиъ чапдиан удубчIвурайи вари Урусатдин литературайинна художествойин журналиъ табасаран шаир Эльмира Аьшурбеговайин шиърар урус чIалназ илтIикIбан конкурс мялум дапIнайивал улупуз шулу.
Журналин редколлегияйин вакилари ихь шаирин яратмишариз заан кьимат тувра. Дурари конкурсдин метлеб вуди, Аьшурбеговайин яратмишар жара миллетарин арайизра адагъуб ва шаириз эсерар таржума апIбан кюмек тувуб, улупура.
Журналин кIулин редактор – Урусатдин халкьдин образованиейин ва педагогикайин аьлим, жямяаьтлугъ кас ва писатель, профессор Борис Тебиевди, Фейсбукдиъ конкурсдин гьякьнаан аьлава мялумат туври, гьамци дибикIна: «Журнали шаирариз ва таржумачйириз поэзия таржума апIбан конкурсдиъ иштирак хьуз теклиф апIура. Бажаругълу дагъустан шаир, Урусатдин писателарин Союздин член Эльмира Аьшурбеговайи табасаран чIалниинди гизаф гюрчег эсерар дикIура. Ич тIалабниинди дугъу журналин редакцияйиз чан шиърар ва дурарин подстрочникар хътаъну. Белки, дугъан шиърар, урус чIалназ илтIикIган, цIийи нур алди арайиз удучIвур. Ва ухьуз авар шаир Расул Гьямзатовдин машгьурвализ лайикь шаирихъди таниш`вал ккилибгурашул».
Э.Аьшурбеговайин шиърар урус чIалназ илтIикIбан конкурс гьацI йисан давам хьибди. Гъалиб гъахьидариз журналин терефнаан пешкешар тувди ва дурари таржума гъапIу шиърар журналин машариъ чап апIиди.
Табасаран шаирин эсерар таржума апIбаъ иштирак хьуз ккуни ватанагьлийирихьан 2020-пи йисан аьхириъ чапдиан удубчIвнайи «Литературайин Таврия» журналин 4-пи нумра интернетдиъ урхуз шулу. Дидик урус чIалназ илтIикIуз теклиф дапIнайи шиърар ва дурарин подстрочникар ка. «Мюгьюббатдин дюъйир» ччвур алди, журналиъ тувнайи думу шиърарикан кьюб исихъ чап апIурача.
* * *
Зав гьитIибшвну,
гъаргъу амсар гьарснайган,
КIаж илдибтну,
гьарар гъайсар духьнайган,
Алдру вахтна
гьубкIну уьл суфрай`ин мерд,
Узу увуз
багъиш гъапIнийза велед.
БицIир,
хъугъуз даршлу мурадсир, гьацир,
Кадаънайсир,
ув`ан чешне адабгъну.
ГучI кадиси
думу хабахъ гъадагъну,
Гъилигнийва,
ачмиш дапIну гъитIнай цIил.
Гьадмуган, гьархну
ихь гъайсар яшайиш
Дюн`яйихъди
сатIи апIру бахтнаан,
Аллагьдиз
чухсагъул гъапнийза кIваан,
Дишагьлиди
апIбан узу яратмиш.
* * *
Гъурбан ишри табиаьтдин
аьдатназ,
Вари жутди дубхну айи аьмалназ –
Жили тяфа ва хпи тяфа хьувализ,
Дурарилан таза насил гъювализ!
Гъалум ибшри, ади фу-вуш пис
метлеб,
ЧIур апIурайдариз му заан мешреб –
Хьуз гъитрайидариз табиаьт
батIил,
Адлу апIури бегьер дархру хутIил.
Чухсагъул, жан Аллагь, узуз
вуди бахт
Тувбан наслиъ уьмур гъибтру
мюгьюббат.
