Дагъустандиъ цIийиди арайиз дуфнайи коронавирусдиз аькси вакцинация гъабхру пунктар 80-рихьна артухъ гъапIну. Дурар шагьрарин, районарин ва участокарин больницйирин бинайиинди арццна. Мидкан гьаму йигъари чан удучIвну улхбаъ вахтназ вуди РД-йин сагъламвал уьбхбан министрин вазифйир тамам апIурайи Татьяна Беляевайи гъапнийи. Дугъан гафариинди, пунктар артухъ апIувализ лигну, республикайин гизаф кьадар агьалйириз коронавирусдиз аькси вакцинаяйин руб рягьятди йивуз мумкинвал гъабхьну.

 

«Урусатдин сагъламвал уьбхбан министерствойин теклифариин ва табшуругъариин биналамиш духьну, сифте вуди вакцинайин прививка чпин яшар 66 йис ва артухъ духьнайи ватандашариз дапIну ккунду. Фицики, му яшариъ айи агьалйир швнуб-саб гъагъи вая сагъ апIуз читин уьзрар кайидар вуди шулу. Коронавирусдиан сагъ хьуз иллагьки гьаму яшариъ айидариз читинди алабхъура. Ухьу шагьидар гъахьиганси, хийлин касар му уьзри уьмриан гъурхну. Гьаддихъди аьлакьалу вуди, узу яшлу касариз варидариз коронавирусдин инфекцияйиз аькси прививка апIуз дих апIураза»,

– гъапну Дагъустандин сагъламвал уьбхбан министерствойин кIулиъ айи Татьяна Беляевайи.

Мидланра гъайри, къайд дапIну ккундуки, вакцинайин руб йивбаккан сахарный диабет, кIван гьендемарин уьзрар, бедендин чагъ’валиан арайиз гъафи ва сагъ апIуз даршлу гъагъи иццрушнар кайи агьалйири затра кIул ккадабгъну ккундар.

Татьяна Беляевайи кIваин гъапIганси, вакцинайин руб йивуз нубатнахъ хулаъ имиди дийигъуз мумкинвал а. Му ляхин кIули гъабхбан бадали, «Госуслуги» порталиъ регистрация дапIну, гьадушв’ан жвуван поликлиникайиз, ясана Дагъустандин Минздравдин «убццру» линияйин телефондин саб вуйи 122 нумрайиз зенг дапIну, нубатнахъ дийигъуз шулу.

Гъийин йигъаз Дагъустандиъ 4 агъзуртIан артухъ агьалйири коронавирусдиз аькси прививка дапIна.