Каспийск шагьур марцци штухъ мягьрум дубхьну, саки гьацI йис шула. Шагьриз марцци шид гъюри адрувал себеб вуди, ноябрин вазлиан мина гъийин йигъазкьан душваз аьхю, швнуб-саб тонна гъюру цистернйириъди жара йишварилан убхъру шид хури гъахьну. Хайлин вахтназ гъагъиди гъубзнайивалихъди аьлакьалу вуди, месэлайиз РД-йин Правительствойиъра гъилигнийи. Гъийин йигъан Каспийск шагьрин агьалйириз туврайи убхъру штун ери фициб вуш аьгъю апIбан бадали, узу РД-йин Роспотребназдорин управлениейиз илтIикIнийза.
Управлениейин пресс-секретарь Сяида Балабеговайин туву мялуматариинди, гьамусяаьт шагьриз гъюрайи штун ерийин ахтармишари улупганси, сарун думу марцциб ву.
«Ноябрин вазлихъан мина саки гьар йигъан учу Каспийск шагьриз гъюрайи штун ерийин анализар апIури гъахьунча. Гьаму муддатнаъ, ахтармишари улупганси, шид зат ишлетмиш апIуз ихтияр адайи, фицики, диди, жюрбежюр уьзрар арайиз хуз мумкин вуйи. Хъа аьхиримжи гьяфтайин йигъари гъуху ахтармишари улупиганси, сарун шид ишлетмиш апIуз ихтияр тувна», — гъапну Роспотребнадзорин управлениейин гъуллугъчийи.
Му месэлайин гьякьнаан Каспийск шагьрин «Водоканал» МУП-дин директорин вазифйир тамам апIурайи Мягьямедгьяжи Шапиевдира мялумат тувну. Дугъан гафариинди, сарун шагьриз гъюрайи шид марцц дубхьна ва агьалйириз думу ишлетмиш апIуз ихтияр тувна.
«Шид лап яманди, 10-20 ражарикьан артухъди кьалу дубхьну, хайлин вахт гъубшну. Гъийин йигъаз штун марцци дарувал лап ис абхъну. Ишлетмиш апIуз ихтияр ади улупнайи нормайин кьадар 2,6 ву, хъа ич гьамусяаьтнан анализари 2,7 улупура.
Шагьриз гъюрайи шид кьалу гъабхьи йигълан хъюгъну, думу марцц апIбан бадали, учу зат сикин дарди ляхин гъубхунча. Вари фильтрйир гьюдюхюнча. КОРиз жара йишварилан гъюрайи кьалу штарра хътатIунча. Гьамци ляхин тамам апIбаан натижайиъ шид марцц гъабхьну. Сарун думу убхъузра ихтияр а. Амма сифте думу убхьури гъахьиш, ужу ву. Шид ишлетмиш апIуз гьаму йигъари шагьрин санитарвалин духтрира ихтияр тувди», — гъапну Мягьямедгьяжи Шапиевди
Гьацира «Водоканал» МУП-дин директори мялум гъапIганси, аьхиримжи 10 йисандин арайиъ шид марцц апIбан ва дидин марццивалин ерийин натижйир сабпи ражари вуди ужударди рякъюра, фицики, шагьрин администрацияйи Роспотребнадзорин управлениейихъди ва шагьрин жямяаьтлугъдихъди сатIиди хайлин ляхин кIули дубхна.
