БицIидар – ихь уьмрин кюкйир ву. Дурарин сагъ’вал ва гележег ужуб хьпаз гьарсар абайина бабу чпин уьмур бахш апIура. Гьаци вушра, сабдиканра фикир ктарди аьхю шулайи велед кми-кмиди аьзарлу хьпан вахтар шулу.
Сагъ апIуз рягьятди вуйи уьзрариан аьзарлу гъахьну кIури, гучI адар. Хъа бицIирик сагъ апIуз даршлу уьзур ачмиш гъабхьиган, хизандиъ хажалатнан гьарай абхъру. Рак уьзур гьацдар чIуру уьзрарикан саб ву. Думу уьзриан аьзарлу гъахьи кас сагъ апIбан бадали, лап багьалу дармнар, йисариинди больницайиъ дахъувал лазим шулу. Бязиган думу аьзарлуйириз я дармнарикан, я сагъ апIбан жара жюрйирикан файда шулдар. Гьацдар аьзарлуйириз гьюкуматдин терефнаан туврайи кюмек гизаф дюшюшариъ гьубкIрира шулдар.
Ракдиан аьзарлу духьнайи бицIидарин месэлайихьна вари халкьарин фикир жалб апIбан бадали, гьар йисан 15-пи февралиъ вари дюн’яйиъ рак уьзриан аьзарлу духьнайи бицIидарин Й игъ къайд апIури шулу. Дагъустандиъ 2004-пи йисхъан мина республикайин бицIидарин клиникайин больницайин дахилнаъди онкогематологияйин отделениейи ляхин апIура. Отделениейин заведующий Индира Юнусовайи учуз мялум гъапIганси, гъийин йигъаз республикайиъ рак уьзриан аьзарлу духьнайи 775 бицIир а. 2020-пи йисан Дагъустандиъ 126 бицIир тазади ракдиан аьзарлу гъахьну.
БицIидарин онкологияйин уьзрарин сиягьнаъ варитIан улихь хьайидар ифдин (лейкоз) уьзрар ву, кьюбпи йишв кIулин маълин нервйирин гъурулушдик жюрбежюр кьюкьяр арайиз гъювали ва шубубпи йишв йиккук кьюкьяр (лимфома ва саркома) хьували дибисна.
«Республикайиъ ДРКБ-йин онкогематологияйин отделениейиъ онкологияйин уьзрар ачмиш гъахьи бицIидар сагъ апIувалин улупбар уьлкейин жара больницйирин кьяляхъ хътар. Ич отделениейиъ, думу гъагъи уьзрар кайи бицIидар сагъ апIбан бадали, вари жюрейин шартIар а, уьлкейин варитIан машгьур больницйириъ, мисалназ, Дима Рогочевдин ччвурнахъ хъайи бицIидарин гематологияйин, онкологияйин ва иммунологияйин центриъ лихурайи аьлимари тартиб дапIнайи сагъ апIбан гьамусдин деврин жюрйир ишлетмиш апIура. Ич отделениейиъ айи бицIи аьзарлуйир сагъ апIбан ляхниъ думу жюре центрарин духтрарихъди аьлакьйир уьрхюрача»,
– къайд гъапIннийи Индира Юнусовайи.
Дугъан гафариинди, бицIи аьзарлуйир сагъ апIбан заан технологйирин саки вари жюрейин кюмек тувувал республикайиъра ишлетмиш апIура. «Гъийин девриъ республикайиъ аьзарлу гъахьи бицIидар хъади уьлкейин жара больницйириз гъягъювалин чарасузвал адар, душваъ тувру кюмек ич отделениейиъра тувра. КIурбин маълин вая бедендин саб гьендем гьюдюхбан операция лазим вуштIан, учу аьзарлуйир жара йишвариз гьаърадарча. Аьзарлу духьнайи бицIидариз имбу кюмек ич отделениейиъ бегьемди тувра», – аьлава гъапIну ДРКБ-йин онкогематологияйин отделениейин заведующийди.
Шиклиъ рягьимлувалин ляхин гъабхурайи Диана Османова онкологияйин отделениейиъ айи бицIидарихъди
