Аьхиримжи йисари ихь уьмриъ швнуб-саб цIийи машкврар учIвнашра, ухдихъан мина гьарсариз ужуди таниш вуйи, хьадукран сабпи вазли ухьу къайд апIру дишагьлийирин машкврихьна вуйи йиз фикрарикан дарпиди гъузуз шулдарзухьан.

 

Гьаддиз улубкьурайи 8-пи Мартдин машквар, варитIан багьалубси, гьарсар баб, дада, хала, чи, риш, саб гафниинди, гьарсар дишагьли дидиз ккилигурайиганси гьибгъри шулзуз.

Магьа, табиаьтдин цIарушнахъди женг гъабхури ва мани нурар жил`ина деетури, ригъра хъади-хъади удубчIвуз хъюбгъна. Аьхълушин имдрубдиин рази гъахьи гьарар-кюлери, укIар-кIажари, кюкйири чпин кIуларра заргуз хъюгъра.

Гьацира, сачдин йисан гьаму вахтнахъан хъюгъну гьамусдизкьан, хабарсузди ва инсафсузди вари дюн`яйиъ убчIву тIягъюнра кьяляхъ хътабкуз хъюбгънайивалира ухьу шад апIура.

Гьякьлуди гъапиш, думу тIягъвни ухьуз ихь сагъламвалихьна жараси илтIикIуз улупну.

Му машкврихъди узуз сабпи нубатнаъди Вечрикк гъулаъ яшамиш шулайи йиз дада – Мина Керимова ва ихь халкьдин вари дишагьлийир тебрик апIуз ккундузуз. Гъит гьарсар дишагьлийин маш шадвалин аьлхъбу балгри, вари дишагьлийириз жандин сагъ’вал, кIван шадвал, уж`валар, хъуркьувалар ккун апIураза.

Гъит кюкйирин кунцIари, гьар вахтна багахь хьайи баяр-шубари, мирасари ичв юкIвар ачухъди, шадди гъитри!
Хьадукран машквар мубарак ибшри!!!

 

Гьюрматлувалиинди Шюшеханум Керимова