Жиниб дар, аьхиримжи йисари ихь ватанагьли баяри спортдиан ужудар хъуркьувалар улупура ва йигълан-йигъаз таза чемпионарин ччвурар ашкар шула. Гьадрарикан сар хилариинди кчIихбан спортдиин машгъул духьнайи Хив райондин Хив гъул’ан вуйи Гере Гьяжитаевра ву.
Му бай чан 6 йис гъабхьихъан мина спортдиин машгъул духьна. Багъри гъулаъ Арсен Рустамхановдин ва Гьяжи Гьяжиевдин хиликкди думу юкьяр дисбиин ва самбойиин машгъул вуди, хайлин йисар гъахьну. Юкьяр дисбаан райондиъ гъягъру вари талитариъ Гере гьаммишан гъалиб шули гъахьну. Бали спортдиан ужудар натижйир улупурайивализ лигну, думу районарин арайиъ гъягъру талитариъра иштирак хьуз хъюгънийи, ва Герейи, думу талитариъра чан кIубанвал улупури, гъалибвалар гъадагъуз хъюгънийи.
«Узуз спорт гьаммишан ккуниб вуйзуз. Дидихьна аьшкь айивал гъябкъиган, адашди узу гъулаъ айи спортдин мектебдиз гьаънийи. Гьаддихъан мина зат думу ляхнихьан ярхла гъахундарза. Районарин арайиъ кIули гъушу талитариъ гъалиб хьпан кьяляхъ, Кьибла Дагъустандин чемпионатдиъра иштирак духьну, душваъра сабпи йи-шван сагьиб гъахьнийза»,
– кIура Герейи.
Хиварин кьялан мектебдиъ 11-пи класс ккудубкIу жигьил спортсмен Воронеждиъ айи Ю.А. Гагариндин ва Н.Е.Жуковдин ччвурнахъ хъайи военный академияйик урхуз кучIвру. Гьамусяаьт дугъу 2-пи курснаъ урхура. Урхбаъ читинвалар алахьурашра, Гере спортдихьан ярхла гъахьундар. Чав урхурайи академияйиъ юкьяр дисбан спортдин жюре адрувализ лигну, думу хиларихъди кчIихьбан спортдиин машгъул гъахьну ва душваъра ужудар натижйир улупуз хъюгъну.
«Спортдиин машгъул вуйи касдихьан сабпну думу дипуз шулдар. Узу академияйик урхуз кучIву йисан дишлади мушваъ юкьяр дисбан спортдин жюре аш, аьгъю гъапIнийза. Душваъ спортдин му жюре адруваликан аьгъю гъабхьибси, хилариинди кчIихру спортдиин машгъул хьуз къарар адабгъну, тренерра гъагунза. Гьамусяаьт Павел Приходько ва Юрий Гончаров тренерари талитарихьна, талитарин вахтна дарсарихьнара гьязур хьуз кюмек апIурайиз.
Мисал вуди гъадабгъиш, гьяфтайин арайиъ 5 йигъан, гьар йигъан 3 сяаьтна, узу спортдиин машгъул шулаза, хъа талитарихьна гьязур шлуган, 5 йигъан, гьар йигъан кьюб ражари, шу-шубуб сяаьтна. Фукьан вушра гъагъиди ву. Гъагъиди ву кIури, йиз абйир-бабари ва йиз тренерари узухъди аьлакьалу апIурайи умудар кIулиз адагъну ккунду», – гъапнийи спортсменди.
Ккудубшу йисан ноябрин 21-пи йигъан Гере урхурайи академияйиъ му спортдиан чемпионат кIули гъубшну. Думу чемпионатдиъ 65 кило гъагъ айи спортсменарин арайиъ Герейи сабпи йишв гъадабгъну. Мушваъ гъалиб хьпаз лигну, думу дявдинна космосдин кьувватарин командайин дахилназ гъядягъну. Думу командайихъди Гере Гьяжитаев, 9-11-пи февралиъ кIули гъубшу хилариинди кчIихбан дявдинна аьршдин кьувватарин чемпионатдиъра иштирак духьну, душваъра 2-пи йишван сагьиб гъахьну.
«Табасарандин нурар» газатдин терефнаан Гере Гьяжитаев гъалибвалихъди тебрик апIурача ва дугъу хъанара артухъ хъуркьувалар гъадагърувалик умуд киврача.
