Гьаму йигъари Табасаран райондин мектебариъ тясир апIруганси эсерар урхру вари Урусатдин живанарин «ЧIиви классика – 2021» X конкурсдихъди аьлакьалу серенжемар кIули гъягъюра. Думу конкурсдиъ 5-11-пи классариъ урхурайи баяр-шубар иштирак шулу.
Конкурсдин метлебар – баяр-шубарин художествойин эсерар урхувалихьна вуйи маракьлувал за апIувал, урус ва харижи уьлкйирин классикарин эсерарихъди таниш’вал яркьу апIувал, тясирлуди урхбан вердиш’валин дережа за апIувал, бажаранлу урхрудар ашкар дапIну, дурариз лазим вуйи кюмек тувувал ва гьацдар жарадар ву.
Конкурсдин шартIариз лигну, думу швнуб-саб этап ади кIули гъябгъюра: классдин, мектебдин, муниципалин, региондин ва вари Урусатдин этапар. Конкурсдин суперфинал 2021-пи йисан июндин вазлиъ кIули гъябгъиди.
Табасаран райондин Р.Гьясановдин ччвурнахъ хъайи Хюрккарин кьялан мектеб райондин варитIан аьхю мектеб ву гъапишра, узу ягъламиш даршлуб аьгъязуз, фицики мушваъ 538 балина шуру аьгъювалар ва тербия гъадабгъура, 85 мялимди ляхин апIура.
Хюрккарин кьялан мектебдин администрация ва мялимарин коллектив классдиъ дару ляхнарихьна жавабдарвалиинди янашмиш шула. Зиихъ къайд дапIнайи конкурсдихьнара дурарин тялукь рафтар а. Конкурс заан дережайиъди кIули гъабхбан бадали, мектебдин администрацияйи хьур касдикан ибарат вуйи жюри тешкил гъапIнийи. Конкурсдин гьякьнаан жавабдарвал, мектебдин завуч А.М. Къурбанов кIулиъ ади, юкьур урус чалнанна литературайин мялимари: А.Ш. Аьлисултановайи, Э.Ш. Мягьямаевайи, Гь.Кь. Гьяжиевди, Г.Н. Аьлиевайи гъабхура.
Гъябгъюрайи йисан Хюрккарин кьялан мектебдиъ 1-пи февралиан 13-пи феврализ классдин этапдин, хъа 15-пи февралиан 24-пи феврализ мектебдин этапдин конкурсар кIули гъушну.
Февраль вазлин 24-пи йигъан кIули гъубшу конкурсдин асас пайнаъ дидин иштиракчйири чпиз кьабул гъахьи прозайин эсерариан кьатIар ва жюрбежюр авторарин гизаф кьадар поэзияйин эсерар гъурхнийи.
Мушвахъди сабси узуз саб гьякьикьат къайд апIуз ккундузуз. Узу, 50 йис мялимвалин пишейиз сарф дапIнайи кас, му конкурсдин иштиракчйири гизаф шад гъапIнийи, гьаз гъапиш иштиракчйирин гьевеслувал аьхюб вуйи. Гьевеслувалин мициб дережа тек-бирра рябкъруб дар. Дурари прозайин ва поэзияйин эсерариан саб-швнуб машнакан ибарат вуйи аьхю кьатIар кIваъланди, шикиллуди ва гьевеслуди урхуйи.
Конкурсдин шартIариинди, вари классарин гъалибчйирин арайиан, вари терефар гьисабназ гъадагъну, муниципалин этапдиъ иштирак хьуз шубур гъалибчи гъядягъну: Ишрабика Рамазанова (7-пи класс), Ислам Сеферов (6-пи класс), Замира Шябанова (5-пи класс).
Дурари райондин конкурс-диъра пешкешнан йишвар гъадагъур кIури, умуд кивраза.
Шиклиъ: конкурс кIули гъубху Г. Н. Аьлиева.
