Макьалайин шилнаъди
«Табасарандин нурар» газатдиъ ляхин апIурайи табасаран халкьдин гьюрматлу вакилар. Узуз учвуз гьаму йисан 26-пи февралиъ чапдиан удубчIву «Табасарандин нурар» газатдиъ тувнайи М.Гьяжиибрягьимовдин «Табасаран чIал – бабан чIал» кIуру макьалайихъди аьлакьалу йиз фикрарикан бикIуз ккунди азуз. Думу макьалайиъ атIагнайи М.Гьяжиибрягьимовдин фик-рар лап дюздар ву.
Узуз пуз ккунди айиб гьадму вуйизки, ихь халкьдин улихь хьайи аьлимари, чпихъди сатIиди мектебариан ужудар мялимарра «гергми столихъ» уч дапIну, гъийин девриъ табасаран чIал аьгъю ва артмиш апIбан читин месэлйириз гъилигнийиш ва дурар гьял апIбан рякъяр гъагнийиш, гизаф ужу шуйи.
Узуз мялум вуйиганси, мектебариъ ккергъбан классариан аьхю классаризкьан табасаран чIалнаан дарсар кивбан сяътар кам дапIна. Фуж-вуш аьлим Москвайиз гъушну кIури, шли-вуш ихь правительствойиъ гафар гъапIну кIури, му месэла гьял апIуз шлуб дар. ДицитIан, йиз фикриинди, табасаран ва урус чIал кивру мялимарра ади, вари уч духьну, саб гафнахъна гъафиш, гизаф дюз гъюру, кIураза. СартIан кьюр, кьюртIан – шубур ужу шул, кIуру аьхюдари. Гьаму жюрейин серенжем тешкил гъапIиш, дина зиихъ къайд дапIнайи макьалайин автор М.Гьяжиибрягьимовдиз дих апIувал йиз терефнаан ккун апIураза.
Редакцияйин терефнаан
Зиихъ чап дапIнайи материал учухьна гьаму гьяфтайиъ гъафиб ву. Дидин автор Шябан Сеидовдихьна илтIикIури, дугъаз му важиблу месэла арайиз адабгъбаз чухсагъул кIурача.
Гьюрматлу Шябан халу, уву гъитIибккнайи месэла гъийин йигъаз ярамишуб ву. Дугъриданра, ихь аьлимарра, табасаран чIал киврайи мялимарра сатIиди уч духьну, табасаран чIалнахъди ва мектебариъ табасаран чIал кивбахъди аьлакьалу меэслйириз гъилигнийиш, харжи ляхин даршлийи. Хъа, гьяйифки, мектебариъ бабан чIалар кивбан сяътар цIиб апIбахъди аьлакьалу месэла, саб табасаран миллетдин вакилар ваъ, кIулди вари Дагъустандиъ, Урусатдиъ бабан чIалариан дарсар киврайи аьлимар, мялимар сатIиди уч духьну, гьял дапIну ккуни месэла ву. Думу месэла гьял апIбаъ жямяаьтлугъдин шериквалра дубхьну ккунду, сабпи нубатнаъ – абйир-бабарин. Хъа гьякьикьатдиъ гъи гизаф абйир-бабари, иллагьки шагьрариъ, чпин веледар, дурариз гъагъ алабхъуру кIури, бабан чIалнан дарсариз гьаърадар.
