Табиаьтди дишагьли, жилижвиси дарди, назук ва уткан вуди халкь гъапIну. Гьарсар дишагьли, наз кади, мюгьюббатну юкIв абцIну, гьарган кIваъ аку хиялар ади яшамиш хьуз гьязур ву. Гьяйифки, дюн’яйиъ варидариз сабсиб кьисмат тувудар. Дишагьли фукьан назукур вушра, кьисматну дугъан кIул’ина кми-кмиди читинвалар хуру. Думу читинвалариан лайикьлуди кIул адабгъбан бадали, назук дишагьлийин гъюнариин жиларинра, хпаринра вазифйир алахьуру.
Табасаран райондин СиртIич гъулаъ бабкан гъахьи Тофик Наврузбегов, чан уьмрин юлдаш Зарима Къазанферовнайихъди бахтлу уьмур хъапIри, чпин шубурпи велед бабкан хьувализ ккилигурайи. Дагъустандиъ думу йисар лап гъагъидар вуйи. Гагь му терефнаъ, гагь тмуну терефнаъ бандитарин жини дестйири тIуркIру сяняаьтар ккиври, къанун уьбхру органарин вакилар, ислягь ватандашар, аьдати ислам диндин вакилар уьмрихъ мягьрум апIури гъахьну. Думу йисари саб жюрейинра тахсир ктру швнур инсан йивну гъийихнийкIа?!
Тофик Наврузбегов къанун уьбхру органарин вакил вуйи. 2006-пи йисан УнцIукул райондиъ хусуси метлеб айи операция гъабхурайиган, думу душмандин хил’ан гъакIнийи. Жилир гъакIихъан тина Зарима Наврузбеговайин аку, бахтлу хиялари абцIнайи уьмур тики-тики гъабхьнийи. Жигьил дишагьлийин хилариин кьюр велед гъузнийи, хъа шубурпир бабкан хьуз цIиб вахттIан имдайи.
«Думуган 2 балин дада вуйза, аьхюну балин яш 6 йистIан дайи. Шубурпи бализ чпин адашдин ччвур тувнийза. Шубур велед хилариин алди, ялгъузди гъузу бабан кIваан фицдар хиялар гъюруш, дугъаз чазтIан мялум дар… КIвазра, кIулизра лап читинди вуйи вахтна йиз дадайин кюмек аьхюб гъабхьнийи, жилирин абйир-бабарира чпихьан шлу кюмек апIуйи.
Дидхъан мина гизаф йисар гъушну. КIван учIврушин яваш гъабхьундаршра, жвуван веледар бадали гьадму учIврушин ади яшамиш хьуз гъудубгъунза, – мялум гъапIнийи Зарима Наврузбеговайи.
– Узу Мягьячгъалайиъ мектеб ккудубкIбан кьяляхъ, Дагъустандин гьюкуматдин медицинайин институтдиъ гъурхнийза, хъа бицIидар айивализ лигну, ляхниъ учIвуз гъабхьундайзухьан. Узу 2007-пи йисан Каспийск шагьриъ ОМОН-диъ фельдшерди ляхниз гъадагънийи. Гьаддихъан мина ОМОН-дин медицинайин частнаъ лихураза. Ляхниъ дици читинвалар адар. Учу бицIиди иццру гъапIган, аьхъю дубхьну, температура за гъабхьиган, кюмек туврача. Гъагъи аьзарлуйир санчастдиз гьаърача. Ляхин кьабулди вузуз. Гъарашугъарин терефнаан гьюрмат рябкъюразуз», – ктибтнийи Зарима Наврузбеговайи.
Гьамус Зарима Наврузбеговайин аьхюну бали университетдиъ урхура, кьюрпи бали – колледждиъ, хъа шубурпи бай гьелелиг мектебдиъ ими.
Зарима Къазанферовна, уву дадавалин вазифйир намуслувалиинди тамам апIурава. Дишагьлийин варитIан аьхю мурад-метлеб – чан веледарин гъуллугънаъ хьувал ву, гьаму веледарилан тина яв юкIв шад ибшрияв!
