Райондиъ вари дигиш’валар, цIийивалар, аьдат вуйиси, райцентрилан ккергъри шулу. Райондин меркез айи гьялну райондин уьмуми гьялнаканра хабар тувру, фицики думу райондин маш ву. Аьхиримжи йисари Хючна гъулаъ ва Хючна гъулан советдин дахилнаъ айи гъулариъ ужувлахъинди вуйи хайлин дигиш’валар рякъюрахьуз: кми-кмиди субботникар тешкил апIура, жямяаьтлугъ йишвар къайдайиз хура, рякъяр рас апIура. Му дигиш’валар советдин кIулиъ айи Аьбдуселим Гираевдин ляхнихъди аьлакьалу ву.
ЦIиб улихьнаси узу «Хючна гъулан совет» гъулан поселениейин глава Аьбдуселим Гираевдихъди гюрюшмиш гъахьунза ва дугъахъди йисандин арайиъ гъубху ляхнин натижйирикан сюгьбат гъубхунза.
– Аьбдуселим Мягьямедгьянифаевич, сюгьбатнан эвелиъ уву кIулиъ айи гъулан советдикан уьмуми мялуматар тувуб ккун апIураза.
– Хючна гъулан совет райондиъ айи варитIан аьхю советарикан саб ву. Дидин дахилнаъ Акъа, ЦIурутIил, Ягъдигъ ва Хючна гъулар а. Советдин жилариин вари 7512 кас яшамиш шула, гьадму гьисабнаан Хючнаъ – 5127, Ягъдигъ – 1089, Акъа – 857, ЦIурутIил – 439 кас. 2020-пи йисан СП-йин аьтрафариин 126 бицIир бабкан гъахьну, 42 кас гъи-йихну. Советдин аьтрафариин культурайин шубуб идара, хьуб ФАП, (Акъа, ЦIурутIил, Ягъдигъ, Асккан Ягъдигъ, Цалак), юкьуб бицIидарин багъ (Хючна гъулаъ – 2, Асккан Ягъдигъ, Цалак мягьялиъ; багарихьди Акъа гъулаъра абццбанди ву), 7 мектеб (Хючна гъулаъ – 3, ЦIурутIил, Акъа, Ягъдигъ, Асккан Ягъдигъ) ерлешмиш духьна.
– Аьхиримжи вахтна халкьдиз хайир кайи фицдар ляхнар тамам дапIначва?
– Кьюб цIийи трансформаторар дивунча – ЦIурутIил гъулаъ 100 киловатт айиб ва Цалак мягьялиъ 160 киловатт айиб. Ягъдигъарин гъулаъ акварин бурузар жара йишвахьинди алдагъну, цIийи мектеб апIуз йишв гьязур гъапIунча. Хючнаъ айи «Гъалибвалин парк» утканди ккабалгну ккудубкIна. Ягъдигъ, Акъа, ЦIурутIил ва Хючна гъуларин кючйириин хяхял алабхьунча. Хючназ гъюрайи 500 метр штун турбйир цIийи алаунча. Больницайихъ хъайи кючейин 950 метр манзилнаъ шид гъирагъдизди деебтру йишвар гьязур дапIна. М.Багъичевдин ччвурнахъ хъайи кючейиъ мархьар гъургъиган, кьалу штар ахмиш шлу гъурулуш тикмиш дапIнача. Хъархъас дабхьру майднарилан бар-йир илтIикIунча. Жилинна душв’ин тикмиш апIру хуларин генеральный план гьязур дапIна.
– Дугъриданра, хайлин ляхин дубхначва. 2021-пи йисаз фицдар планар йитIначва?
– Планариъ «Хючна гъулан совет» СП-йин аьтрафар уткан апIувал, кючйирин ччвурар ва хуларин нумрар китIувал; Асккан Ягъдигъарин накьварихъна рякъ апIувал; Хючнаарин кючйиригъ инсанар гъягъру гъирагъар дюз алаувал; Цалкан Хючназди гъягъруган инсанар улдучIвру гъяд рас апIувал; ЦIурутIил гъул’ан мектебдихъна гъюру йишвахьинди умбрар апIувал; кючйиригъ гъяйи аквар рас апIувал ва жара ляхнар улупнача.
Гъулан советдин дахилнаъ айи гъулариъ штухъди вуйи месэла учIруди дийибгъна. Думу гьял апIбан бадалира, саб жерге уьлчмйир кьабул апIбанди вуча, гьадму гьисабнаан Хючназди гъюрайи штун турбйир ва Акъа гъулаъ булагъ рас апIувал. Акъа гъулаъ цIа кабхъувалин дюшюшар гъахьиган, думу ктIубшвуз штун резервуар дивуз ният айич.
– Хючна гъул неинки гъулан советдин аьхюбсиб гъул, думу гьацира райондин меркез ву, ва мушваъ вари райондиз аид вуйи жюрбежюр серенжемар, мяракйир гъягъюри шулу. Цци Табасаран райондин агьалйирихьан Хючнаъ кIули гъягъру фицдар серенжемариъ иштирак хьуз хьиди?
– 2021-пи йисан августдин вазлиъ Хючна гъулан 100 йис хьпан аьхю серенжем кIули гъябгъиди. Думуган «ВаритIан утканди ккабалгнайи хал» кIуру конкурсра кIули гъабхиди, гъалиб гъахьидариз ужудар пешкешарра тувди. Му серенжемдихьна Хючна гъулан агьалйир ва ухьу вари лап дикъатлуди гьязур духьну ккунду. Райондиз фуж гъафишра, дугъу сабпи нубатнаъди марццишназ, рякъярин гьялназ, аквариз ва гъулан утканвализ фикир тувру. Сасдар касари марццишин уьбхбак чпин зегьметнан пай кивра, хъа сасдари, дурариз (гьюкмариз) ухьу буржлу вуйин кIури, аьтрафар, зирзибил дабхьри, чиркин апIура.
Улихьнаси райондин вари гъуларин жямяаьтарихъди советарин ва райондин кIули айидари гюрюшар гъухнийи. Дурар гъахру вахтна гъуларин вакилари чпихь гьял дапIну ккуни месэлйир гъитIирккуйи ва чпин тIалабар кIуйи. Гьацдар серенжемар Хючна гъулан советдин дахилнаъ айи гъулариъра Табасаран райондин главайин заместитель Заур Мусаевдин иштирак’вал ади кIули гъушнийи. Администрацияйин вакили райондиъ гьамусдизкьан дапIнайи ва апIуз ккайи ляхнарикан ктибтнийи. Дугъу гъапиганси, агьалйирин варитIан гизаф аьрзйир Хючнаан Цалкан мина Акъа гъулазди гъябгъюрайи рякъ лап читин гьялнаъ айиваликан ву, гьаддиз 2021-пи йисан думу рякъ асфальт улубзуз пландик кипна. Гьацира Акъа гъулаъ цIийи мектеб тикмиш апIуз документар гьязур апIувалиинра зегьмет зигурача.
– Ужудар ниятар кIулиз удучIврияв. Чухсагъул интервью тувбаз.
