«Мялим» кIуру гаф гьарган ихь ушвниин ал, амма дугъу ихь уьмриъ фукьан аьхю зегьмет зигураш, фикир апIурадархьа. Инсанариз сабпи ражари уьмрин жилгъа мялимари мектебдиъ абццру. Гьарсар мектебдиъ урхурайирикан инсан хьпан бадали, мялимди фукьан зегьмет зигуру, чан кIван манишин тувру.
Йиз макьалайин игит – образованиейин цирклиъ 30 йистIан артухъ муддатнаъ мектебдиъ лихурайир сар аьла-матнан инсан, аьхю гьярфналан мялим, чан зегьметниинди урхурайидарин арайиъ аьхю гьюрмат гъазанмиш дапIнайи Мямядагъа Мурадханов ву.
Мямядагъа Ризаевич Мурадханов 1968-пи йисан 3-пи мартдиъ Табасаран райондин Акъа гъулаъ нежбрин хизандиъ бабкан гъахьну.
Хючнаарин кьялан мектеб ккудубкIну ва армияйин жергйириъ ватандиз гъуллугъ дапIну, Мямядагъа Мичуриндиъ айи гьюкуматдин педагогвалин университетдин биологияйин факультетдик урхуз кучIвру. Вуз заан кьиматариз ккудубкIу дугъу зегьметнан рякъ 1990-пи йисан Дагъниарин ООШ-диъ мялимвалилан ккебгъну. Хъасин Акъа гъулан кьялан мектебдиъ биологияйин дарсар кивру мялимди лихуз хъюгъну.
1997-пи йисхъанмина Акъа гъулан кьялан мектебдиъ директорин заместителди лихури а. Мушваъ Мямядагъа Ризаевичди сабпи йигълан мина мектебдин профсоюздин председателин вазифйирра тамам апIура.
Му касди мектебдиъ «Багъри юрд аьгъю ва ахтармиш апIру живанар» кIуру кружокра абццну. Дугъан регьберваликкди мектебдиъ урхурайидари Акъа гъул’ан Ватандин Аьхю дявдиз гъушдарикан саб хайлин мялуматар уч дапIна.
Мектебдин ТОКС-дин дестейи дявдиъ гъудургу ватанагьлийир агбан бадали, гизаф ляхин апIура. Гъийин йигъаз Акъа гъул’ан вуйи, дявдиъ гъудургу кьюр касдин – Шихмягьяммед Аьгьмедовдин ва Маллагъурбан Мурадхановдин шил дибихъна. Гьацира сарсан ватанагьлийин – «Уьру хяд» ордендин сагьиб вуйи Рамазан Нурмягьямедовдин дявдин тарих гъибихъну.
Мямядагъа Ризаевичдин жягьтлувалиинди Ватандин Аьхю дявдин гъалибвалин 70 йис хьпаз тялукь вуди, Акъа гъул’ан мектебдин гъвалахъ дявдиъ гъийихдариз гюмбетра дивна.
Мялимди чан хуларин гъвалахъ, Акъа гъулан вуйи гьарсар игитрин ччвурнахъ 11 гьар кивну, «Гъалибвалин аллеяра» дапIна.
Заан категорияйин мялим М.Р. Мурадхановди илимдин ляхинра гъабхура. Чан хиликк урхурайидарихъди сабси дугъу ахтармиш апIбан проектарра тешкил апIура. Гьар йисан Урусатдин «Йиз бицIи Ватан», «Аьхю дявдин игитар» ва гьацдар жара яратмиш апIбан проектариъ учвра иштирак шула. Гьаци, 2017-пи йисан му кас Урусатдин «Аьхю дявдин игитар-2017» кIуру конкурсдин финалист гъахьну ва медалихъдина грамота-йихъди лишанлу гъапIну.
Мямядагъа Мурадха-новди гъулан жямяаьтлугъ ляхнарра тамам апIури шулу. 2010-пи йисан халкьдин перепись гъубхган, думу «Вари Урусатдин переписдиъ чан ляхин дикъатлувалиинди апIбаз лигну» медалихъди лишанлу гъапIнийи.
2017-пи йисан Мямядагъа Мурадхановдиз, варитIан ужур мялимдизси, Табасаран райондин главайин грант ва гьюрматнан грамота тувну.
Мямядагъа Мурадханов 2005-пи йисхъанмина Уру-сатдин образованиейин лайикьлу гъуллугъчи ву. 2015-пи йисан дугъаз «Мялимвалин ляхнин ветеран» кIуру ччвурра тувну.
Чан хпир Секинатдихъди дугъу хьур бицIир дюрхну арайиз адагъну. Варидариз заан ва кьялан образованиера тувну. Мямядагъа Ризаевичдиз ургур худул а, ва дурарикан думу гизаф разиди ву. Дугъан варитIан ккуни вахт – хьадан вахт ву – худлар абайихьна ва бабахьна гъюру вахт.
