Аьдат вуйиси, 25-пи мартдиъ вари Урусатдиъ культурайин гъуллугъчийин Йигъ къайд апIуру. Му йигъахъди тебрик апIури, улихьнаси Дагъ. Огни шагьрин культурайин Хулан директор, культурайин цирклиъ хайлин йисари лихурайи Феруза Мягьямедовайихъди гюрюшмиш гъахьнийза.

 

– Феруза Аьбдулмежидовна, Дагъустандин Огни шагьриъ айи культурайин ужагъари гъабхурайи ляхникан ктибтуб ккун апIураза.

– Улихьган культурайин ужагъар гьаммишан халкьдин гъуллугънаъ ади гъахьну. Советарин вахтари ихь жигьилари чпиз ккабхъу азад вахт аьхю аьшкьниинди культурайин ужагъариъ адапIури шуйи, иллагьки гъуларин культурайин хулариъ. Шеш-беш, шахматар, шашкйир апIуйи, шли каманчи, чюнгюр йивуз дубгъуз гъягъюйи, фуж художествойин самодеятельностдиъ иштирак шуйи. Хъа гъи, ухьуз рябкъюрайиганси, жигьиларин терефнаан культурайихъди ужуб аьлакьа, дидихьна вуйи гьевес имдар. Гъи варидарихь телефонар хьа ва дурарин фикрар, маракьар, аннамиш’вал дигиш духьна.

Культурайин ляхин жанлу апIувал – вари халкьдин асас вазифа ву. Хъа культурайин ужагъар гьаммишан ихь халкьдин гъуллугънаъ а. Мисалназ, Дагъ. Огни шагьриъ мектебариъ урхурайи баяр-шубари ва мялимари, жюрбежюр машкврариъ активвалиинди иштирак шули, гьамусра культурайин Хулан сягьнайиин жюрбежюр серенжемар гъахури, художественный самодеятельностдин концертар улупури, машквриз ва жара машгьур йигъариз тялукь вуйи вечерар тешкил апIури шулу. Гьацира Дагъ. Огни шагьрин администрацияйин аьхю пай серенжемарра ич культурайин Хулаъ гъахури шулу. Гьамусяаьт шагьрин культурайин ужагъариъ 32 кас лихура. Чухсагъул кIураза гъи йиз коллективдиз, гьаз гъапиш дурари чпихьан шлуганси, хъуркьруганси, ужуб ерийин ляхин апIура. Фунуб машквар гъабхьишра, культурайин пишекрар иштирак даршлу мярака адар. Дурари, багъри культура уьбхбан важиблу гьяракат, дидин пропаганда бадали, аьхю зегьмет зигура.

Гьаммишан баяр-шубарихъди ялхъвнар апIбан, хорин, драмайин, музыкайин кружокар гъахурайидарра ихь культурайин хулан пишекрар ву. Дагъ. Огни шагьриъ искусствойин кьюб мектебра тIаъна, ва гьацира баяр-шубариз устадвалин кружокар ачмиш дапIна. Думу искусствойин мектебар ич культурайин Хулан дахилнаъ а. Республикайиъ кIули гъягъру жюрбежюр фестивалариъ, искусствойин цирклиан тешкил апIру талитариъ иштирак’вал апIурача. Дицдар фестивалариъ, талитариъ иштирак гъахьи гизаф пай баяр-шубари гъалибвалин йишварра гъадагъури шулу.
Ухьуз гъи бажаранвал кайи, ужудар баяр-шубар гизаф а. Ва учу дурариз культурайин Хул’анра гьюрматнан грамотйир туври шулча.

– Дагъ. Огни шагьриъ дуламиш шулайи вари миллетар гьисабназ гъадагъиш, аьхюну пай табасаранар ву. Шагьриъ хайлин жара миллетарин вакиларра а. Хъа учву машкврариз вуйи концертдин программйир дюзмиш апIруган, фициб къайдайиинди ляхин гъабхурачва?

– Ав, ухьуз мялум вуйиганси, Дагъ. Огни шагьриъ дуланмиш шулайидарин аьхюну пай ихь табасаранар ву. Амма узу, миллетар цIиб-артухъ ву дупну, дурар саб вахтнара жара гъапIу кас дарза. Культурайин хулаъ гьарсаб улубкьурайи машквриз вуйи концертдин программйир гьязур апIруган, гьарсаб миллетдин артистаризра теклиф апIури, узу вари миллетар сатIи апIураза. Ав, дугъриданра, культурайин Хал ихь халкьдин гъуллугънаъ айиб ву. Гьаз гъапиш учу тешкил апIурайи мяракйир ихь халкьдин гьевесниинди, иштирак’валиинди кIули гъахурайидар вуйич.

– Сюгьбатнан аьхириъ культурайин цирклиъ лихурайи гъуллугъчйир чпин пишекрарвалин машкврихъди тебрик апIуз мумкинвал авуз.

– Гъи ихь уьлкейин культурайин цирклиъ лихурайи вари гъуллугъчйир ва йиз коллектив пишекарвалин Йигъахъди кIваантIан мубарак апIураза. Гъит варидариз Аллагьди сагъ’вал туври, ихь кIул’ин гьаммишан ислягьвалин зав ибшри.