Гъябгъюрайи йисан Дагъустандиъ «Гъуларин аьтрафарин месэлйир гъварчди гьял апIбан гьякьнаан» гьюкуматдин программайин серенжемар уьмриз кечирмиш апIуз бюджетдиан 816 миллион манаттIан артухъ дакьатар (776 млн федералин ва 41 млн манат республикайин бюджетариан) жара дапIна кIури, РД-йин гъулан мяишатдин ва ипIру-убхъру сурсатарин министерствойин пресс-гъуллугънаан мялум апIура.
Жара дапIнайи думу дакьатарихъ республикайин гъулариъ 400 ва 120 баяр-шубариз деъру йишвар айи кьюб мектеб дивди ва гьацира шубуб гъулаъ шид зигуз турбйир ккирчди. Мидланра гъайри, «Гъуларин аьтрафарин месэлйир гъварчди гьял апIбан гьякьнаан» программайин дахилнаъди жара дапIнайи дакьатарихъ спортдин кьюб майднарра тикмиш апIиди ва хьуб гъулаз газра зигиди.
Къайд апIуб лазим вуки, сач тикмиш апIуз ккергъу спортдин майднарихъди ва 4 медпунктдихъди аьлакьалу тикилишчивалин ляхнар цци аьхирихъна хпан бадали, республикайин бюджетдиан хъанара 60,7 млн манат жара дапIна.
