Улихьна йигъари Кострома шагьриъ Урусатдин Федерацияйин Яракьлу кьувватарин радиация, химия ва биология жигьатнаан уьрхбан месэлйир гьял апIру кьушмариъ гъуллугъ апIурайидарин арайиъ хилариинди кчIихбариан чемпионат кIули гъубшну.

 

Къайд дапIну ккундуки, гьаму чемпионат кIули гъабхури, гьамус 5-пи раж ву. Му ражари хилариинди кчIихбан талитариъ Урусатдин Федерацияйин оборонайин министерствойиъ гъуллугъ гъабхурайи ихь ватанагьли, швнуб-саб ражари чемпион духьнайи Асгьяб Сефербеговра иштирак ва, икибаштIан, гъалибра гъахьну. Му чемпионатдиъ Асгьяб Сефербегов чав гъуллугъ апIурайи Камышин шагьрин химия ва биология жигьатнаан уьрхбан месэлйир гьял апIру жаради вуйи кьушмарин тереф гъюбхну.

Мартин Сефербеговдин хиликкди талитариз гьязур шулайи А. Сефербегов му ражари 75 кило гъагъишин айи спортсменарихъди талитариз удучIвну. Шубур спортсмендихъди талитар духну, Асгьябди дурариин варидариин гъалибвалар гъадагъну ва Урусатдин Федерацияйин Яракьлу кьувватарин радиация, химия ва биология жигьатнаан уьрхбан месэлйир гьял апIру кьушмариъ гъуллугъ апIурайидарин арайиъ хилариинди кчIихбариан чемпион гъахьну.