Культурайин циркликан улхруган, дишлади фикриз шаду мяълийир апIру артистар, теат-рарин вакилар ва культурайин хулариъ лихурайидар гъюру. Аьхиримжи йисари ихь республикайиъ культурайин цирклиз артухъси фикир тувуз хюгъна. Хайлин районариъ, гъулариъ айи культурайин хуларра рас алаъну, душвариъ жюрбежюр серенжемар кIули гъахура.
Узуз гъийин йиз макьалайиъ газат урхурайидар «ТIюрягъ сельсовет» СП-йиз дахил шулайи Урусатдин халкьарин аьдати культурайин центрин гъуллугъчи Мислимат Гьяжикъаибовайихъди таниш апIуз ккундузуз.
Мислимат Гьяжикъаибовайин му центриъ методистди ляхин апIури, сарун 11 йис ву. Му дишагьли гьар йисан жюрбежюр машкврарин серенжемарин программйир гьязур апIбаъ иштирак шула. Дугъан регьберваликкди аьдати культурайин центриъ рибарихьди убхуз улупбаан, шахматар, шашкйир ва ялхъвнар апIбаан ТIюрягъ гъулан мектебдиъ 4-пи ва заан классариъ урхурайи баяр-шубариз кружкйирра ляхник кирчна.
«Гьяфтайин арайиъ 3-4 йигъан мина мектебдиан бицIидар кружкйириз гъюра. Гьадрарихъди ляхин гъабхурача. Эгер багарихьди фицибкIа машквар шулаш, баяр-шубарихъди сатIиди думу машкврихъди аьлакьалу нумрарра гьязур апIурача.
Мидланра гъайри, ич центрин директор Сураят Гьяжикеримовара кIулиъ ади, сад агъзуртIан артухъ улихьдин шей’ар айи музейра тешкил дапIнача. Гъийин йигъаз ичубси гизаф экспонатар айи музей ихь райондин гьич саб гъулаъкьан адар. Душваъ кемшрин йигьгар, дакьру гварар, гаргвнар, билхар, гъянтар, тIурнар, салтIнар, угънар, хутIлар хъаъру дуруц ва гьацдар хайлин жара шей’ар а.
Вахт-вахтарик музейиъ айи шей’ариз лигуз, гъулан жигьиларси, жара йишварилан туристарра гъюри шулу»,
– кIура культурайин хулан методистди.
Ав, Мислимат Гьяжикъаибовайи мялум апIурайиганси, думу музейиъ айи шей’арин кьадар кудухну ккудубкIуз шулдар. Сач хабарсузди дина узура алдахъунзу. Урусатдин халкьарин аьдати культурайин центрин дахилнаъ музейиъ уч дапIнайи экспонатар гъяркъиган, мюгьтал гъахьунзу. Музейиз гъафидар мушваъ айи саки вари шей’арихъди Мислимат Гьяжикъайибовайина Сураят Гьяжикеримовайи таниш апIура. Гъийин деврин жигьилариз думу шей’арин метлеб, дурар наан ва фици ишлетмиш апIуруш аьгъдар, гьаддиз гьаму кьюр касди, кружок жюрейиз илтIибкIну, музейиъ ихь ата-бабйири улихь деврариъ мяишатдиъ ва гьар йигъандин яшайишдиъ ишлетмиш апIури гъахьи мутмйирикан гъюрайи наслариз ктибтура.
«Узу методиствалин ляхин апIурайир вушра, гьаммишан ич культурайин хулан пишекрари жюрбежюр серенжемариз гьязур апIурайи бицIи сягьнйирин нумрйириъра иштирак шулаза. Гьаму йисарин арайиъ ТIюргъярин культурайин хулан коллективдихъди сатIиди райондиндин, республикайин дережайиъди кIули гъуху серенжемариъра иштирак шули гъахьунча. Магьа цци мартдин вазлиъ ихь райондин культурайин управлениейи учкан Эбелцнан машкврихъди аьлакьалу нумра гьязур апIуб тIалаб гъапIнийи. Гьязур дапIнайи нумра хьади учу Мягьячгъалайиъ кIули гъубшу республикайин фестивалиъ иштирак гъахьунча. Улихьна йисарира райондин терефнаан швнуб-саб серенжемдиъ иштирак’вал гъапIунча. Саб гафниинди, узу методист вуза кIури, анжагъ методиствалин ляхин дапIну гъузрадарза. Коллективдихъди сабси имбуну ляхнариъра иштирак шулаза»,
– аьлава гъапIнийи Мислимат Гъяжикъаибовайи.
Шиклиъ: (гагвлахъан арчлахъинди) Шаир Сяидов, Сураят Гьяжикеримова, Мус-лимат Гьяжикъаибова, Расим Гьарунов.
