Хьадукран йигъар куркIу вахтнахъан мина Дербент шагьриъ айи «Горзеленхоз» МБУ-йин гъуллугъчйир сикин дарди шагьрин кючйир марцц апIувалиин, дурар къайдайиз хувалиин эллешмиш духьна. Чпи гъабхурайи ляхникан мялуматар тувуб ккун апIури, узу «Горзеленхоз» МБУ-йин директор Сергей Алагькъулиевдихьна илтIикIунза.

 

Ич гюрюшра Дербент шагьрин Мамедбеговдин ччвурнахъ хъайи кючейиъ гъабхьнийи – Сергей Алагькъулиевди чан гъуллугъчйирихъди душваъ ляхин апIурайи.

– Сергей Сефибегович, уву фици Дербент шагьриз лихуз гъафнуш, апIурайи ляхнин асас метлеб фу вуш, газат урхурайидариз ктибтуб ккун апIураза.

– Йиз пише экономиствал вуйиз, амма уьмриъ ихь шагьрарин паркар ва кючйирихъ хъайи бицIи багълар ккабалгувал кьисмат гъабхьунзуз.
Узу йиз ляхниин гизаф рази вуза, гьаз гъапиш шагьрариъ дуланмиш шулайи инсанари учу яратмиш апIурайи гюрчег’валикан мянфяаьт ктабгъура. Варидариз хусуси хулар айиб дар, хъа гизаф мертебйирин хулар ерлешмиш духьнайи кючйириъ инсанариз рягьятвал гъадабгъру паркар, бицIи багълар дюзмиш апIувал ич идарайин вазифа ву. Дербент шагьриз ляхниз гъяйиз, Каспийск шагьриъ «Анжи Аренайиъ» ляхин апIури 10 йискьан гъабхьнийиз. Мина узу ляхниз хъади гъафир Хизри Абакаров ву. Дугъу, апIурайи ляхнихьна вуйи йиз марццивализ кьимат тувну, узу чан командайиз кьабул гъапIну.

– Гъи «Горзеленхоз» МБУ-йиъ швнур пишекри ляхин апIура?

– Ич идарайъ 65 пишекар лихура, дурарикан 5% хусуси метлеб айи пишекрар – агрономар ву. «Горзеленхоз» МБУ-йин идарайиъ агрономдин асас вазифа – шагьриъ кивнайи гьарарин ва кюкйирин артмиш’вал ахтармиш апIури, дурариз аргъаж хьуз кюмек апIувал ву.
2008-пи йисхъан мина Дербент шагьур тарихнан ва культурайин гележег уьбхбан меселйириан Евразияйин региондин отделениейин Вари дюн’яйин «Кидикьнайи шагьрар ва йишван гьюкмар» тешкилатдин членвализ кьабул дапIна. Хъа мициб шагьур ухьу варидари гъи, хилар хъиржвну, дюбхну ккунду. Ихь наслар ухьу апIурайи ляхнариз лигиди, му ляхин аьдатнаъ убчIвди, дурарира ухьу гъизигу жафйир уьрхиди.

– Ичв идарайик кибтIнайи аьтрафдиин швнуб парк ерлешмиш духьна? Дербентдин агьалйири гъи, шагьрин кючйириъ айи вари гьарар алдатIура кIури, аьрзйир апIура. Му ляхин фтихъди аьлакьалу ву?

– Гьюлин гъирагъдихъ хъайи паркра кади ич идарайин гьисабнаъ 6 парк а. Дербент шагьриъ айи накьваригъишвра учук кибтIна. Гьамусяаьт шагьрин кючйириъ айи вари гьарар цIийи алаурача. Хъа кючйириъ гьарар алдатIбахъди аьлакьа адарич. Гьарар алдатIурайидар жара идарайин гъуллугъчйир ву. Мисалназ, электросетдин пишекрарин вазифа – Дербент шагьрин агьалйир хътудубтIди токдихъди тямин апIувал ву. Хъа думу месэла гьял апIбан бадали, электрикдин тел фтиккIа ктрубкIди зигуб лазим ву. Кючйириъ айи бязи гьарари электрикдин симариз яманди манигъ’вал апIури гъахьну. Гьамус думу месэлара гьял гъапIну – электрикдин телин ацIу симар жиликкди гъизигну ва шагьриъ цIийи гьарар кивну.

– Улихьна йисари вари кючйир цIийи алаури, гьарар киври, чиркин штариз вуйи турбйир гьюдюхюри гъахьну, хъа гъи гьадму кючйир цIийикIултIан таза алаура. Гьаму ляхнар фици рякъюравуз?

– Гьарсаб гьюкуматдин, шагьрин, гъулан, хизандин кIулиъ закурин йигъкан фикир апIру эйси духьну ккунду. Хъа уву къайд гъапIу вахтари кIули гъуху ляхнарин ери лап асккан дережайинуб гъабхьну ва сад-кьюд йислан думу аьгьвалат ашкар хьуз хъюбгъну. Инсанди гьарсаб ляхин, дидкан агьалйири 10-20 йисандин арайиъ мянфяаьт ктабгъруганси, дапIну ккунду. Хъа ухьухь думу саягъ лихувал аьдатнаъ ипнадар. Хизри Абакаров Дербент шагьриз гъафихъан мина, гизаф дигиш’валар духьна. Гъи узу, дугъан ихтибарвал батIул дарапIбан бадали, ич идарайи тамам апIуз хъюгънайи гьаму ляхнар ужуб ери ади кIулиз адагъуз чалишмиш шулаза.
Инсан чав апIурайи ляхнарихьна жавабдарвалиинди янашмиш духьну ккунду. Гьадмуган гьарсаб ляхинра улихь гъябгъюру.