Гьар вахтна зегьмет зигури яшамиш шули гъахьи ихь ватанагьлийир яшайишдин гъулайвалари кагьал дапIнайиганси рякъюразуз. Улихьна йисари гьарсаб хизандиъ баяр-шубар уьмриз гьязур апIури гъахьнуш, аьхиримжи вахтна ихь юрднаъ я зегьметнахьна, я урхбахьна маракьлувал адру жигьилар йигълан-йигъаз артухъ шула.
Ав, яшайишдиъ гъулайвалар ади хьувал ужуб ляхин ву, анжагъ гъийин рягьят дару девриъ жвуван веледариз дуланажагъдиъ алахьру игьтияжар гьуркIуз шлуси яшамиш хьуз улупувал гьарсар касдин асас буржи ву. Бикарвал айи ихь республикайиъ думу буржи тамам апIуз рягьятди даршра, мумкинвалар адар, пуз шулдар. Йиз фикриан, ляхин апIуз ккунириз, думу бихъуру.
Гьамусяаьт Дербент райондиъ яшамиш шулайи агьалйир ляхнихъди фици тямин апIураш аьгъю апIуз узу му райондин ЦЗН-дин директорин заместитель Гогьар Нагиевайихъди гюрюшмиш гъахьунза.
Дугъан гафариинди, агьалйир ляхнихъди тямин апIуз шлудар АПК-йин цирклин тешкилатартIан дар. «Улихьнаси гъуларин ФАП-ариз терапевтар ва жара духтрар лазимди вуйи. Мектебариъ ва жара тешкилатариъ пишекрар гьуркIну а. Гъийин йигъаз ич тешкилатдин гьисабнаъ 700 кас а. Дурар ляхнихъди тямин апIбан бадали, вари чарйир агури шулча. Райондиъ ляхин дибрихъу касар Урусатдин жара йишвариз кючмиш шулу. Гъийин жигьилариз гьеле-меле ляхнарра кьабул шулдар. Крым Республикайиъ гъяд дивру вахтна, дина ляхниз пишекарвалин ужуб дережа айи рабочйир кьабул апIуйи. Ихь ватанагьлийир заан пишекарвал айидар дар. Дурари ляхин апIуз чпи дубгъура», – кIура Гогьар Мамедовнайи.
Агрофирмйириз багарихьди, гьавйир мани гъахьиган, рабочйир герек хьиди. Мяишатари ляхнар жанлуди ккергъру вахтна (май вазлихъан октябриз) ЦЗН-ди 1000-лан 1500-дихьна рабочйир ляхниз гьаъра.
«Татляр» агрофирмайиъ чпин рабочйириз гьар йигъан 800-1000 манат тувра ва дурари Татляр, Падар, Къарадагъли, Уллу-Теркеме, Берикей гъулариан вуйи агьалйир сабпи нубатнаъди ляхниз кьабул апIура, хъа тIумтIар ккудутIру вахт- на жара йишвариан вуйидарра. Му тешкилатдиъ жигьиларра лихура. Маважиб ужуб вуйивали дурарин жилиин зигру зегьметнахьна вуйи маракьлувал артухъ хьуз гъитра. Вари ляхнар ккудукIу вахтна, дурариз премйирра тувра ва гьацира тIумтIар ккудутIру вахтна 1 бедре тIумтIарра хулаз гъахуз ихтияр а»,
– давам гъапIну Гогьар Нагъиевайи.
Гьацира ихь юрднан агьалйир йимишар уч апIру вахтна Краснодар крайдиз, Крым Республикайиз гъягъюра.
ЦЗН-дин пишекрари, хусуси дилаварчивал артмиш апIбан бадали, гьюкуматди туврайи пландииндира агьалйириз кюмек апIура.
«Учу дурариз бизнес-проектар гьязур апIуз кюмек апIурача. Гизафси деллегчйирин салонар, машинар рас апIру, тортар гьязур апIру тешкилатар ва фермервалин мяишатар ачмиш апIбаз фикир тувра. Гьацира лихуз ихтияр айи II ва гьацира III группайин инвалидариз ляхин тувуз чарйир агурача. Сач 24 касдиз кюмек гъапIунча. Дурар гизафси агрофирмйириъ гъаравларди, табельщикарди, кафейиъ гъабар жикIрударди, яна рягьятди тамам апIуз шлу ляхнариз гьаърача. Ихь республикайин социалинна зегьметнан министерствойи инвалидариз асас фикир тувра. ЦЗН-дин пишекрари дурарихъди гъабхурайи ляхин гьар вахтна министерствойин гюзчиваликк кка»,
– къайд гъапIну Гогьар Мамедовнайи.
Дупну ккундуки, Дербент шагьриъ хусуси дилаварчйириз магазнариъ ва хурагар гьязур апIру тешкилатариъ лихуз гьаммишан пишекрар лазимди шулу. Дурариз маважибарра заан образованиейин дипломар хьайи, гизаф йисарин тажруба айи бюджетдин пишекраризтIан цIибди туврадар. Саб гафниинди, ляхин апIуз ккунириз, думу бихъуру. Хъа ляхин ужуб саягъниинди тамам апIбан бадали, гьарсар инсанди лайикьлуди зегьметра дизигну ккунду.
