Урусатдиъ хусуси лицевой счетдин номер улупнайи пенсияйин чарасуз вуйи страхованиейин кагъзин шагьадатнама адабгъури амдар. Думу туврира амдар. Гъурулушдин цIийи иштиракчйирикан мялуматар электрондин жюрейиндар хьиди. Хъа Урусатдин агьалйирин хилиъ айи карточкйир кьувватнаъ гъузра. Дидин гьякьнаан Урусатдин Пенсйирин фонднаан мялумат тувра.

Пенсйирин чарасуз вуйи страхованиейин гъурулушдиъ мицисдар дигиш’валар хьувал хусуси касдин гьякьнаан федералин къанундиъ тIаънайи дигиш’валар кьувватнаъ учIвбахъди аьлакьалу ву.

Урусатдин гьюкмар ватандашдин цифрайин сурат ишлетмиш апIуз хъюгъювалихьна гьязур шула. Гележегдиъ Урусатдиъ кагъзин паспортарра ишлетмиш’валиан удучIвиди. 2021-пи йислан тина паспортра электрондинуб хьибди. Цифрайин сурат – му юридический кьувват айи электрондин документарин ва уьлкейин мялуматарин гъурулушдиан (ГИС) вуйи улупбарин гъварч ву.

Думу шубуб пайнакан ибарат хьибди: 1) инсандикан асас улупбар – паспорт, СНИЛС, ИНН; 2) уьлкейин гъурулушариан вуйи жара улупбар; 3) хусуси улупбар тартиб апIуз разивал тувру сиягь.

Цифрайин суратди кагъзин документар ишлетмиш апIувал лап цIиб апIиди.