Дагъустандиъ айи Урусатдин Федерацияйин налогарин гъуллугънаъ гизаф кьадар налогдин бурж кайи касарин «КIару сиягь» дапIна кIури, «Табасарандин нурар» газатдиз РД-йин УФНС-дин пресс-гъуллугънан начальник Багьаудин Аьлиевди хабар тувну.

 

Дугъан гафариинди, айи девлетнан налогдин бурж кади «кIару сиягьназ» гъадагънайи инсанарин кьадар аьхиримжи гьисабариинди 188 кас ву. Дурарин сабишв’инди вуйи буржнан кьадар 432,6 миллион манат шула.

Багьаудин Аьлиевди мялум гъапIганси, гьамусяаьт ихь республикайин бюджетдиз дурубкьну ккуни налогдин варитIан гизаф, яна 36 миллионна 766 агъзурна 135 манат, бурж кайи кас Жапаров Арслан Зейнулабидович ву. Кьюбпи йишв’ин, 15 миллионна 143 агъзурна 950 манат налогдин бурж кади, Мягьямедов Адам Голоевич ерлешмиш духьна, хъа 3-пи йишв’ин, гьюкуматдиз буржлу вуйи 188 касдин сиягьнаъ Аьбдурягьманов Мягьямед Аьбдурягьманович ал. Дугъан буржнан кьадар 12 миллионна 311 агъзурна 703 манат ву.

«Зиихъ къайд дапIнайи вари 188 касдикан мажбур вуди налогдин бурж ктипбан бадали, му касарин банкариъ айи дакьатарикан пул ктабгъуз тялукь уьлчмйир кьабул апIура ва дидин гьякьнаан суддин приставарин гъуллугъназ мялумат тувра»,

– аьлава гъапIну пресс-гъуллугънан начальникди.