Апрелин 2-пи йигъан «Табасаран район» МО-йин администрацияйин главайин образованиейин месэлйириз лигру заместитель Заур Мусаевдин регьберваликкди совещание кIули гъубшну.
Совещаниейиъ «Табасаран райондин образованиейин идара» МКУ-йин начальник Аьбдусалам Гьясанов, адмминистрацияйин кIулин бухгалтер Фяргьят Агъаризаев, «СЕЗ» МАУ-йин кIулиъ айи Сулейман Къягьриманов, РД-йин Правительствойи тяйин дапIнайи «150 мектеб» проектдиъ иштирак хьуз гьязур вуйи образованиейин тешкилатарин директорар иштирак гъахьну.
Му проект республикайин муниципалитетари мектебарин материалинна техникайин аьгьвалат цIийи алапIбан теклифнан тереф уьбхювалихъди аьлакьалу ву.
Проект уьмриз кечирмиш апIбан шартIариз асас вуди, республикайин шагьрарин ва районарин ерли самоуправлениейин органарихьан региондин бюджетдиан 2 миллион манат дакьатар адагъуз хьибди. Гьаддихъди сабси, муниципалитетдин бюджетдин иштираквалин варитIан цIиб кьадар 5%, хъа меценатарин (пулин кюмек апIуз удукьру девлетлу касарин) иштирак’вал 15%-тIан артухъ вуди ккунду.
Гьамусяаьт «150 мектеб» проектдиъ Табасаран райондин 12 мектебди иштирак’вал апIбанди ву: АхьтIарин, Сиртчарин, Бургьанкентдин, ТIаттларин, Ярсарин, ГьепI-ларин, Къужникарин, Гелин-батандин, Хянгъярин мектебар, «Юлдаш» ЦО, Хючнаарин 1-пи ва 2-пи нумрайин мектебар.
Проектдиъ иштирак хьувалин аьрзйир конкурсдин натижйириинди гъядягъиди. Аьрзйир апрелин 15-пи йигъазкьан кьабул апIиди.
Зиихъ ктуху мектебарин кIулиъ айидари, проектдиъ иштирак хьпан бадали, гьаму имбу йигъари лазим вуйи вари документар гьязур апIиди. Эгер конкурсдиъ гъалиб дархьиш, гьязур дапIнайи проектдинна сметайин документацияйиинди гъюру йисанра жюрбежюр программйириъ иштирак хьуз мумкинвал хьибди.
Гьамусяаьт мектебарин дараматарин йирсивалин дережа швнуб процент вуш аьгъю апIура, мектебарин йирсивалин гьякьнаан актар дикIура. Мектебарин коллективар мялуматарин дакьатариан тина мектеб рас апIуз, цIийи мектеб дивуз кюмек тувуз мумкинвал айи касарихьна илтIикIура.
Зиихъ ктуху мектебарин арайиъ «Юлдаш» ЦО-ра а. Образованиейин му тешкилат Хючна гъулаъ ерлешмиш дубхьна ва 2006-пи йисхъан мина либхура. «Юлдаш» ЦО-йиъ урхурайи баяр-шубар республикайиъ, райондиъ гъахурайи жюрбежюр конкурсариъ ва олимпиадйириъ иштирак шула, ва пешкешнан йишвар гъадагъура.
«Табасарандин нурар» газатдиз «Юлдаш» ЦО-йин директор Элина Шихмягьямедовайи мялум гъапIганси, центр 1956-пи йисан тикмиш гъапIу Хючнаарин мектебдин дараматдиъ рас апIбан ляхнар гъахбан кьяляхъ ачмиш гъапIуб вуйи.
Аьхиримжи йисари ЦО-йиъ урхурайи баяр-шубарин кьадар аьхюб вуйивализ лигну, душваъ классарин ужагъарди жюрбежюр йишвар ишлетмиш апIура.
«Юлдаш» ЦО-йин коллектив, «150 мектеб» проектдиъ иштирак хьуз кюмек тувувал ккун апIури, Урусатдин аьтрафариин яшамиш шулайи, кюмек апIуз мумкинвал айи инсанарихьна илтIибкIура, фицики меценатари кюмек тувувал проект кечирмиш апIбан чарасуз шартI ву.
«Мектебдиз кюмек гъапIдарин ччвурар ич идарайин гъизилин фонднаъ, мектебдин дустарин арайиъ гьаргандиз гъузди»,
– гъапну чан ватанагьлийирихьна вуйи илтIикIбаъ Элина Шихмягьямедовайи. Мектебдин кIулиъ айидар гьаму адресназ хътапIру кюмекназ ккилигура: mkou.yuldash@mail.ru.
АхьитI гъулан мектебдин цIийи дарамат цIиб улихьнаси – 2011-пи йисан либхуз хъюбгъну, гьаци вушра душваъ мялимарин коллективдихьан гьял апIуз даршлу месэлйир гизаф а. Мектеб тикмиш апIруган подрядчикди деету гъалатIариан спортзаликк ккиву пол мектебдикк ккивнайибтIан саб метрин исди гъабхьну, марцци гьава гъюру йишв адар, гьаддиз ккивнайи пол убтIура, спортдин дарсар гъахуз читинди алабхъура.
«Мектебдин аьтрафар ккабабалгди думу кьабул гъапIнийча, гьамусра мектебдихъ бару хътар; ядигар, музей дивру йишвканра тикилишчйириз гьархну. Мектебдиъ айи гьяжатханйир мичIлидар ву, цIа кабхъувалин хатIасузвал уьбхбан бадали шид убзру йишваъ шид дийибгъурадар»,
– мялум гъапIну ич газатдин мухбириз «АхьитI СОШ» МКОУ-йин мялим Замир Нурялиевди.
Му мектебдин кIулиъ айидари, мялимари, гъуландари проектдиъ иштирак хьувалиинди чпин месэлйир гьял апIуз кка. Мектебдиз проектдиъ улупнайи кьадар пул тувуз гьязур вуйи меценатра гъидихъну.
