Мялум вуйиганси, аьхиримжи йисари агьалйир, асас вуди жигьилар, наркотикарин асиллувалиъ ахъбан натижайиъ жямяаьтлугъдиз, кIул’инди хизанариз ккудудукIру дердерна читинвалар арайиз гъюра. Му жигьатнаан наркотикарикан айи хатIалувалин гъаврикк ккаъбан ляхин СМИ-йин вакилари ва жавабдар гъуллугъари сикин дарди гъабхурашра, гьяйифки, аьгьвалат йигълан-йигъаз анжагъ гъизгъин шула. Гьаддиз йишвариин му ляхин гъабхувал жанлу апIбаъ аьхю мяна а.
Хив райондин полицияйин УР-дин НОН-дин вакил Аьлипулат Хидировди субут апIурайиганси, къанунсузди наркотикар тарагъбаз, дурар алвер ва ишлетмиш апIбаз аьксиди гъабхурайи ляхнихьна йишвариин жямяаьтлугъ сагъу кьувватар, асас вуди хизандиъ баяр-шубарихъан жавабдарвал гъабхурайи абйир-бабар, ижмишнаан жалб апIувализ фикир тувну ккунду.
– Учу кми-кмиди райондин мектебариъ, асас вуди аьхю классариъ урхурайидарихъди, деврин саб жерге хатIалу терефарихьан уьрхбан гъаразнаъ ади, гюрюшар гъахурача. Гьаму йигъарира полицияйин, диндин, гьюкмин ва жигьиларин месэлйириз лигру гъуллугъчйирин уьмуми кьувватариинди мектебариъ наркотикарихьан живанар уьрхбан гъаврикк ккаувалин серенжемар тешкил дапIна.
Гъийин заманайи жюрбежюр хатIалу идеологйирин, гьадму гьисабнаан терроризмдин, наркоманияйин, жюрбежюр уйнамишар гъахбан къурхулу терефкрарин тясирнакк ккахъбан варитIан аьхю хатIа фикир, фагьум дудубкьну адру живанариз а.
Улихьди наркотик анжагъ гинбикан, дидихъ хайлин зегьмет дизигну, арайиз хурайиш, гъи синтетикайин жюрбежюр наркотикари уьмриъ «ижми» йишв дибисна. Дурарин асиллувалиъ ахъувалра анжагъ дакьикьйирин ляхинтIан дар. Гьаддиз гьарсар абайина бабу чпин веледарин уьмрихьна вуйи маракьар саб вахтназкьан гюзчиваликк уьрхбан чарасузвал арайиз дуфна.
Учу, учухъди сабси саб жерге жара жавабдар гъуллугъарира, му камивалариз аьксиди лазим вуйи уьлчмйир кьабул апIурача, амма, текрар шулза, дид’ин гъалиб хьпан бадали, жямяаьтлугъди жавабдарвал гьисс апIбаъ аьхю мяна а. Гьаз-вуш гьелелиг гьарсар касди му ляхин апIувализ гъирагъ йивура. Мисалназ, улихьнаси кьабул гъапIу серенжемарин натижайиъ райондин саб жерге жигьилар, му зегьернахьна иштагь улупури, думу гъирагъдилан масу гъадабгъру йишварин гъаразнаъ айивал субут гъабхьну. Ахтармишар, кьяляхъна гъаврикк ккаъбан ляхин гъубхиган мялум гъабхьиси, чпин веледарин маракьарикан абйир-бабариз хабаркьан адар. Му фу гаф ву?!
Живанариз тялукь тербия тувбан ляхин мюгькам дапIну ккунду. Ихь наслариз бахтлу гележег тешкил апIбан гъаразнаъ ухьу дархьиш, жарадар гьичра ихь гъайгъушнаъ хьидар», – гъапну Аьлипулат Хидировди.
