Инсанар гьарган ужудар, заан ерийин рякъяр, деврин тIалабариз жаваб тувру яшайишдин объектар дапIну ккуниваликан улухури шулу. Му вари ляхнар ухьу гьарури гьюкуматдин хазнайиз туврайи налогарихъ тамам апIурайидар ву. Хъа налогар тувну ккуниваликан улхуз хъюгъюбси, гьаз-вуш ихтилат жара терефназди илтIибкIуру. Гьаци вушра, аьхиримжи йисари налогар уч апIбан ляхин ужуди улихь гъябгъюра ва бюджетдиз гъюрайи налогарин кьадарра швуб-саб ражари артухъ дубхьна.

 

Мисалназ, сач ихь республикайиъ Урусатдин Федерацияйин бюджетдиз гъафи налогарин кьадар 2019-пи йисантIан 8,5 миллиард манатдин артухъ ву.

Мидин гьякьнаан Федералин налогарин гъуллугънан Дагъустан Республикайиъ айи управлениейин пресс-гъуллугънаан «Табасарандин нурар» газатдиз туву мялуматариинди, сачдин йис 2019-пи йисахъди тевиш, сач Урусатдин сатIи вуйи бюджетдиз гъафи налогарин кьадар 2019-пи йисантIан 5 миллиард манатдин артухъ ву. Яна республикайин агьалйирихьан федералин бюджетдиз гъюрайи налогарин кьадар 117% за гъабхьну.

Хъа Дагъустан Республикайин уьмуми бюджет тамам апIбакан улхури, федералин налогарин гъуллугънан РД-йин управлениейин регьбер Гъазинур Апсалямовди къайд гъапIганси, бюджет 111% тамам гъапIну, аьлава вуди бюджетдиз 2,6 миллиард манат гъафнийи. 2019-пи йисандин улупбарихь тевиган, думу кьадарну 112% тяйин апIура.

«Мидланра гъайри, аьхиримжи вахтари республикайиъ физический касари мал-мутмуйихъан туврайи налогра ужуди уч апIура. Мисал вуди гъадабгъиш, 2017-пи йисан мал-мутмуйихъан туврайи налогдин уч гъабхьи вари кьадар 5% вуйи, 2020-пи йисан дидин кьадар 37% гъабхьну.

Хъа транспортдин налогдикан улхуруш, гьамусяаьт думу налог муниципалитетарин бюджетариз гъябгъюра, ва уч гъабхьи дакьатарихъ йишвариин рякъярра рас апIуз хъюгъна»,

– аьлава гъапIну дугъу.