Гьяйванатар сагъ апIбан хирургияйин асас бина ккивдарикан сар, машгьур урус аьлим-академик, Нобелин премияйиз лайикь гъахьи Иван Павловди чан энциклопедияйиъ: “Аьдати духтри инсанар сагъ апIуру, хъа ветеринарияйин духтри – инсаният” кIуру гафар гъидикIнийи. Думу гафар дидхъан мина ветеринарияйин цирклиъ гьякалси учIвну. Дугъриданра, гьяйванатар сагъ апIру духтрин пише гизаф эдеблу, лайикьлу, рягьимлу пишйирикан саб ву. Ва му пише гъадабгъдарин арайиъ хабарсуз инсанар хьуб мумкин дар.

 

 

Гьарсаб республикайин вая шагьрин ветеринарияйин гъуллугънан улихь важиблу месэлйир дийигъна: райондиъ гьяйванатарин арайиъ тарагъру уьзрарин аьгьвалат уьбхювал, гьясил апIурайи мал-къарайин никк-дин ва йиккун сурсатдин ветеринарияйин ва санитарияйин цирклариан хатIасузвал тямин апIувал, гьяйванатарикан тарагъру уьзрарин профилактикайин серенжемар гъахувал, гьяйванатар сагъ апIувал ва гь.ж. Гьаму ва жара месэлйир Санкт-Петербургдин ветеринарияйин управлениейи заан дережа-йиъди гьял апIура. Думу управление-йиъ лихури, ихь табасаран дишагьли Наиля Гьяжигьюсеевайин шубуд йистIан артухъ ву. Му вахтнан арайиъ дугъу гьам сагъ апIуз хурайи гьяйванатарин эйсйиринси, чав лихурайи коллективдин терефнаанра аьхю гьюрмат гъазанмиш дапIна.

Наиля Ферзуллаевна Мамедгъала поселокдиъ бабкан гъахьну. Дурарин хизан гьадму саб вахтна Хив райондин Мажвгул гъул’ан Мамедгъалайиз кюч гъахьнийи. Гьеле мектебдиъ урхури имиди, Наиля Гьяжигьюсеевайиз юридический вая военный образование гъадабгъуз ккундийи. Хъа адашди дугъаз ветеринарияйин пишейизра фикир тувбан теклиф гъапIнийи. Ва, адашдин гафарихъ хъебехъну, риш Санкт-Петербург шагьрин гьюкуматдин ветеринарияйинна медицинайин академияйик урхуз кучIвру. Академияйиъ думу ихь ватанагьли, машгьур аьлим, профессор Алавудин Аьлиевдихъди таниш гъахьнийи. Вуз 2016-пи йисан ккудубкIну, Наиля Гьяжигьюсеева душваъ микробиологияйин, вирусологияйин, иммунологияйин кафедрайиъ аспирантурайик кучIвру. Дугъан илимдин ляхнин руковолителар Алавудин Аьлиев ва Валерий Бакулин вуйи.

“Му аьлимар, Урусатдиъси, вари дюн’яйиз машгьур инсанар ву. Узуз дурарихъди сатIиди лабораторияйиъ лихуб, жюрбежюр ахтармишар гъахуб кьисмат гъабхьунзуз. Гьяйифки, йиз кандидатвалин диссертация дюбхну шубудпи йигъан, Алавудин Аьлиев кечмиш гъахьну кIури, гъеебхьнийзуз. Думу лап ужур инсан ва аьлим вуйи. Дугъан дарс, туву насигьятар саб вахтнара гьархидарза”, – мани гафариинди кIваин апIура чан мялимар Наиля Ферзуллаевнайи.

Аспирантурайиъ урхурайи вахт- на дугъу гьадму академияйиъ лекцйирра гъахури гъахьну. Мидланра гъайри, Наиля Санкт-Петербург шагьриъ ва Ленинградский областдиъ айи Дагъустандин жигьиларин тешкилатдин вакилра вуйи.

“Узу студент вуйи йисари думу тешкилатдин кIулиъ Расул Аьбдулхаликьов айи. Дугъу Дагъустандиан дуфнайи жигьиларин ва студентарин месэлйир гьял апIуз, тешкилатдин вакиларигъян гъядягъну, 10 касдикан ибарат вуйи совет тешкил гъапIну. Гьарсар касди чан вазифйир тамам апIури гъахьну. Узу волонтервалин ва рягьимлувалин ляхнарин жавабдарвал гъабхурайза. Дагъустандиан Санкт-Петербургдиз больницйириз гъюру инсанариз кюмек апIбан бадали, дурарин улихьна гъягъюри шуйза, читин аьгьвалатнаъ ахъу хизанариз, сагъ апIуз гъагъи уьзрар кайи бицIидариз рягьимлувалин кюмек уч апIури, больницйириъ дахънайи бицIидарихьна пешкешар хьади гъягъюйза”, – ктибтура Наиля Гьяжигьюсеевайи.

Наиля Ферзуллаевна ветеринарияйин управлениейиъ лихури, саки 4 йис шула. Санкт-Петербург шагьрин ветеринарияйин управление-йин начальникдин сарпи заместитель Аьли Аьлиевдин кюмекниинди, дугъкан гъи духтир-хирург духьна. Наиля Гьяжигьюсеевайи Санкт-Петербургдиъ ва Урусатдин хайлин жара шагьрариъ кми-кмиди кIули гъягъюрайи жюрбежюр конференцйириъ иштирак’вал апIури шулу.