Зюльфира Исаева 1973-пи йисан 27-пи декабриъ Табасаран райондин Гюгьрягъ гъулаъ аьхю ва албагу хизандиъ бабкан гъахьну. Дурарин хизан 6 гъардшиканна 5 чуччкан ибарат вуйи. Гюгьрягъ гъулан кьялан мектеб ккудубкIну, Зюльфира Исаева 1990-пи йисан Твериъ медицинайин училищейик урхуз кучIвру, ва кьюд йислан думура хъуркьувалиинди ккудубкIуру.
Зюльфира Исаева 1993-пи йислан мина гъийин йигъазкьан Табасаран райондин ЦРБ-йиъ терапевтарин отделениейиъ духтри улупу сагъламвалин серенжемар кIули гъахру медсестради лихура. Гьамусяаьт Дагъни гъулаъ, Акъа гъулан гъвалахъ хъайи Хяр’ин кIуру йишвахь аьхю гъядухъ яшамиш шула, чан уьмрин юлдшихъди 2 байна 1 риш тербияламиш апIура.
Улихьнаси узу Зюльфира Аьбдулязизовнайихъди гюрюшмиш гъахьунза ва дугъкан чав гъабхурайи ляхникан ктибтуб ккун гъапIнийза.
– Узуз духтирвалин кесп гьарган кьабулди вуйиз. Иццру касдиз жвувхьан шлу кюмек апIуз чалишмиш духьну ккунду, думу гьарсар духтрин буржи ву. Инсанарин сагъ’вал уьбхювал, гъайгъу зигувал духтрарин уьмрин мяна вуйиганси гьисаб апIураза.
Йиз зегьметнан рякъ 1993-пи йислан ккебгъну. Сабпи нубатнаъ пуз ккундузузки, ич коллектив гизаф ужуди, жавабдарвалиинди, юкIв хъади лихурайидарикан, рягьимлу юкIв айидарикан ибарат ву.
Эгер гьаци дархьиш, му ляхин кIулиз адабгъуз даршул. Ич отделениейиз хайлин аьзарлуйир илтIикIури шулу, гизафси давление айидар, юкIв иццрудар, сахарный диабетдиан иццурайидар ва гьацира жарадар. Аьзарлуйири дих гъапIган, тяди кюмек тувуз гъягъюрира шулча. Иццрударин хулариз гъягъюри, дурар фициб гьялнаъ аш, ахтармиш апIури. Бязиган, ляхнин йигъ ккудудбкIбан кьяляхъ багарихь хьайи аьзарлуйирин капельницйир апIуз хулариз гъягъру вахтарра гизаф шулу. Йиз ляхнин юлдшарикан улхуруш, узуз хайлин ужудар духтрарихъди лихуб кьисмат гъабхьунзуз. Ухьухь гьам ярашугъарин, гьамсана райондин агьалйирин терефнаан аьхю гьюрмат айи духтрар а. Дицисдар инсанарихъди лихруган, иццрурихьна вуйи дурарин янашмиш’вал гъябкъиган, лихуз артухъдиси ккун шулу.
Жигьил духтрари, дицисдар гъуллугъчйирихъан нумуна гъадабгъури, зегьмет зигури гъахьиш, ужу шул, – гъапнийи дугъу.
Узу Зюльфирайихъдиси, дугъу гъайгъу зигурайи аьзарлуйир Нижейбат Рамазано-вайихъди (Дагъни гъул), ФатIимат Маллялиевайихъди (Гъулли гъул), Зайдат Мурзаевайихъди (Пилигъ гъул), Сеяде Нурялиевайихъди (Дарвагъ гъул), Асият Аьлимурадовайихъди (Акъа гъул) гюрюшмиш гъахьнийза. Дурари варидари Зюльфирайикан ужувлан гафартIан апIури адайи. «Дугъан ляхникан, аьзарлуйирихьна вуйи янашмиш’валикан, гьюрматлуваликан аьзарлуйирра, больницайин кIулиъ айидарра разиди ву, лазим вуйи рубар-дармнарихъдира тямин апIури шулу. Дугъан хилра лап пучIуб ву, руб йивруган аьгъюкьан шуладар, вахт-вахтарик думу гьииди адрудар аш, ккуниб-даккниб аш гьерхри, аьзарлуйирилан илтIикIури шулу», – гъапнийи дурари.
Зюльфира Аьбдулязизовнайи коллективдин ва агьалйирин арайиъ аьхю гьюрмат гъазанмиш дапIна. Дугъан намуслу зегьмет райондин больницайин руководствойин терефнаан швнуб-сабан гьюрматнан грамотйир тувбиинди лишанлу дапIна. 2004-пи ва 2008-пи йисари думу ра-йондин варитIан ужур медсестради гьисаб гъапIну. 2015-пи йисанра, медицинайин гъуллугъчйирин йигъахъди тебрик апIури, дугъаз райондин администрацияйин терефнаан грамота тувну. Коронавирусдиан аьзарлуйир гъюз хъюгъхъан мина, саб вазлин арайиъ уьру зонайиъ ляхин апIбаз лигну, дугъаз Дагъустан республикайин глава Владимир Васильевдихьан чухсагъул мялум апIбан кагъаз гъафну. Зюльфира Аьбдулязизовна агьалйириз кюмек апIуз гьаммишан гьязур ву.
Гъит дугъаз ва думу лихурайи коллективдиз заан хъуркьувалар ишри. 12-пи май вари халкьарин медсестрйирин йигъ ву. Му йигъахъди тебрик апIури, Зюльфирайиз жандин мюгькам сагъ’вал, кIван шадвал ва агьалйирин сагъламвалин гъаравлиъ хьпан ляхниъ аьхю хъуркьувалар ккун апIурхьа.
