Лап багарихьди мусурмнариз гирами вуйи Рамазандин ваз аьхирихъна гъюра. Гизаф касари, машкврихьна гьязур шули, багахьлуйириз пешкешар гъадагъура, ушвнин сеэр тувра, машквран йигъан суфрайихъ дивру меълишнар гьязур апIура, жвуван хулар, гьяятар, кючйир марцц апIура.
Гъубшу йисан коронавирусдин тIягъюн мялум гъапIган, мистарра кмиди хъяркьнийи, инсанари, хъайи-хъайиси диндин тIалабар тамам апIуз даршули, Аллагьдикан ихь арайиз дуфнайи чIуру уьзур ярхла апIувал ккун апIури, дюъйир урхури, Рамазандин ваз гьарсар касди чан хулаъ адапIнийи. Думу вахтари яшнан аьхю касари инсанар сар-сарихьан ярхла шулайиваликан, мициб ляхни дагъустанлуйирин хялар кьабул апIбан аьдатар ккутIрайиваликан улхбар гъахуз хъюгънийи. Дугъриданра, 2020-пи йисан мартдин аьхирарихъан мина июндин ваз ктабхъайизкьан, уьзрихьан гучI дубхьнайи инсанар тIягъвни хулариъ тIаънийи.
Гьаму йисан уьзур цIиб кьяляхъ гъубшну. Рамазандин вазлиъ мусурмнариз динди улупнайи аьдатар хъауз манигъ’вал апIрур гъахьундар. Уьлкейин мусурмнари, чпи яшамиш шулайи шагьрариъ мистариз гъягъюри, таравих гъудгнар сатIиди апIури гъахьну. Хъа гьаму гирами вазлин сабсана ужуб аьдат – ярхи йигъди ушв дибиснайи мусурмнари хябяхъган сатIиди ушв гьибтувалин серенжемар (ифтарар) гъахувал ву. Ифтар саб ушв гьибтувал дар, ифтарин вахтна мусурмнари чпин чвевалин аьлакьйир мюгькам апIуру, арайиъ айи уьмуми месэлйирикан улхуру, дурар гьял апIбан рякъяр агуру.
Майдин 9-пи йигъан РД-йин милли политикайин ва диндин ляхнарин министерствойи, вари харжар чан кIул’ина гъадагъну, Мягьячгъалайиъ Жвумийин мистан аьтрафариин «Гъалибвалин ифтар» кIули гъубхну. Серенжемдиз гьюрматлу хялижвди Дагъустандин муфтий шейх Аьгьмад Эфендийиз теклиф дапIнайи.
Вахтназ вуди РД-йин милли политикайин ва диндин ляхнарин министрин вазифйир тамам апIурайи Энрик Муслимовди уч духьнайидар Ватандин Аьхю дявдиъ гъалибвал гъадабгъну 76 йис тамам хьувалин машкврихъди тебрик гъапIнийи. Дугъу къайд гъапIганси, Ватандин Аьхю дявдиъ вари жюрейин динар хъаърудари, гьадму гьисабнаан гизаф мусурмнарира, Гъалибвал багахь апIбак лайикьлу пай кивну. «Мягьямад Пайгъамбри (с.аь.в.) гъапиганси, Ватандихьна вуйи ккунивал – диндин саб пай ву», Аьхю Гъалибваликан кIваинди гъибтувал – ихь буржи ву», – гъапну Энрик Муслимовди.
Гьаму йисан Табасаран ва Хив районарин имамар кIулиъ ади гизаф йишвариъ, гьадму гьисабнаан Мягьячгъалайиъ, Дербентдиъ, Санкт-Петер-бургдиъ, Москвайиъ, ифтарар кIули гъушну.
Ужувлан ляхнар фуну вазли гъапIишра, харжи даршул. Хъа гьаму Гирами вазлин аьхиримжи йигъари женнетдин раккнар ачмишди шулу кIур, гьаддиз уж’вал апIуз гьялак йихьай, инсанар!
