Ккудубшу гьяфтайиъ, Ватандин Аьхю дявдиъ Гъалибвал гъадабгъну 76 йис хьпаз бахш вуди, Табасаран райондин юкьуб гъулаъ – Урзигъ, ЧIвурдаф, ЦIийи Лижваъ ва Гисик – дявдиъ иштирак гъахьи игитариз ядиграр ачмиш гъапIну.
Му шадлугънан серенжемариз къайд дапIнайи гъуларин агьалйир, мектебдиъ урхурайи баяр-шубар, райондин администрацияйин гъуллугъчйир ва жюрбежюр идарйирин, жямяаьтлугъ тешкилатарин вакилар уч гъахьнийи. Сабпи шубуб гъулаъ гъахьи важиблу мяракйириъ иштирак хьуз Мягьячгъалайиан ихь ватанагьлийирра – Дагъустандин Халкьдин Собраниейин депутатар Алавудин Мирзабалаев ва Сефер Аьлиев, вахтназ вуди республикайин юстицияйин министрин вазифйир тамам апIурайи Къазимягьямед Сефикъурбанов, хъа Гисик гъулаъ ядигар ачмиш апIруган, республикайин Правительствойин председателин сарпи заместитель Нюсрет Уьмаров ва РД-йин ЖКХ-йин ва энергетикайин министр Ризван Мурадов гъафнийи.
Вари гъулариъ Ватан бадали дявдин женгариъ чпин жанар фида гъапIу гъуландарин гьюрмат уьбхбаз бахш дапIнайи мяракйир лап жанлуди ва маракьлуди кIули гъушнийи. Дупну ккундуки, Ватандин Аьхю дявдин йисари му юкьуб гъул’ан фронтдиз 140-рихьна касар гъушну, дурарикан гьацIартIан кьяляхъ гъафундайи. Гьаци, Урзигъ гъул’ан дявдиз гъушу 25 касдикан (Нурмягьямед Аьбдуллаев, Уьмар Гьясанбегов, Гюлягьмад Гюлов, Ражаб Гюлов, Юсуф Исаев, Ражаб Исмяилов, Аьбдулмежид Къурбанов, Къази Къурбанов, Гьяжиибрагьим Мазанов, Чупан Мягьмудов, Гьяжимягьямед Уьмаров ва гь. ж.) анжагъ 16 кастIан кьяляхъ гъафундар. ЧIвурдаф гъул’анра дявдиз 25 кас гъушнийи, дурарикан анажагъ 18-ризтIан, гьадму гьисабнаан Султан Расуловдиз, Мягьямед Къазиевдиз, Шамсудин Исмяиловдиз, Аьбдулгьялим Рашидовдиз, Аьгьмед Мурадялиевдиз, чIивиди ватандиз гъюз кьисмат гъабхьундар.
ЦIийи Лижваъ ачмиш гъапIу ядигарик Ватан уьбхюз дявдиз гъушу 48 касдин ччвурар дидикIна. Гьадрарин арайиъ гизаф женгарин иштиракчйир гъахьи Шихкерим Керимов (дявдин женгариъ улупу кьягьялвализ лигну, дугъаз 20 орден ва 15 медаль тувну ва уьлкейин кIулиъ айидарихьан, гьадму гьисабнаан И. Сталиндихьан, чухсагъул мялум апIбан кагъзар гъафну) ва Гьябибуллагь Уьмаров (дугъаз Ватандин дявдин II дережайин, Машгьурвалин III дережайин орденар, «Дирбаш’вал улупбаз лигну» ва жара юбилейин медалар, И. Сталиндихьан чухсагъул мялум апIбан кагъаз ва жара наградйир тувну) къайд апIуб лазим ву.
Дявдин йисари немец чапхунчйирихьан Ватан уьбхюз Гисик гъул’ан 18 кас гъушну, дурарикан кьяляхъ 5 кас – Аьбдул-Керим Гьясанбегов, Гьяжиаьгьмед Аьбдуселимов, Аьли Ханмирзаев, Мягьямед Байрамбегов ва Гьяжиаьли Рамазанов – гъафну.
Вари ядиграр му гъуларин жямяаьтарин, гъулариан удучIвну душну, жара йишвариъ яшамиш шулайи касарин дакьатарихъ дивдар ву. Мисалназ, Гисик гъулаъ ядигар Карелияйиъ яшамиш шулайи гисикжви Мягьямед Мурадялиевдин жягьтлувалиинди ва дугъан пулин дакьатарихъ тикмиш гъапIуб ву, имбу гъулариъ ядиграр дивувалин теклиф райондин кIулиъ айи Мягьямед Къурбановдинуб вуйи, хъа гъуларин жямяаьтари думу теклиф разивалиинди кьабул гъапIнийи.
Урзигъ ядигар гъулаъ учIвру йишвахь дивну, ЧIвурдаф гъулаъ – культурайин Хулан икриъ, хъа ЦIийи Лижваъ ва Гисик – гъуларин мектебарин гьяятариъ.
Мяракйириъ удучIвну улхури, Табасаран райондин глава Мягьямед Къурбановди гъуларин жямяаьтар му кIваин гъубзру ва аргъаж шулайи насил ватанпервервал жигьатнаан тербияламиш апIбаъ аьхю эгьемият айи серенжемарихъди мубарак ва ядиграр диву устйириз чухсагъул мялум гъапIнийи. Дугъу уч духьнайидариз Табасаран райондиан Ватандин Аьхю дявдиъ 4000-тIан артухъ касар иштирак гъахьиваликан, чпик кайи гьунарар улупну, дурари, багъри Ватан уьбхбан бадали, чпиз табшурмиш гъапIу вазифйир намуслувалиинди тамам гъапIуваликан ктибтнийи. «Ихь гъийин наслин буржи – ихь ватанагьлийири дявдиъ улупу игитвалар гьаммишан кIваинди гъитувал ву», – аьлава гъапIнийи Мягьямед Къурбановди.
Мягьячгъалайиан дуфнайи гьюрматлу хяларира дявдиз гъушдариз ядиграр дивувалиъ аьхю мяна айивал тасдикь гъапIнийи, Ватан бадали дявдиъ жанар диву ветеранарин ирс дюбхну ккуниваликан гъапнийи.
Гъулан жямяаьтдин терефнаан удучIвну гъулху агъсакълари ва жара гьюрматлу касари ядиграри гъулан жигьилариз аькьвлин аьхю тербия, советарин халкьди дявдин вахтари улупу игитвал кIваин гъибтуз кюмек туврувал субут гъапIнийи ва райондин администрацияйиз ва хялариз чухсагъул гъапнийи.
Уьру лента гьадабтIбалан кьяляхъ, дуфнайи хялари, гъулан яшлу касари ва гъуландари ядиграрихъ кюкйир дивнийи.
Му серенжемар гъахурайи вахтна мектебариъ урхурайи баяр-шубари дявдикан вуйи шиърар гъурхнийи, чпин гъуландари дявдиъ улупу гьунарарикан ктибтнийи.
