Гьюрматлу ватанагьлийир!
Магьа Ватандин Аьхю дяви ккудубкIну, 76 йис тамам дубхьна. Гъалибвалин Йигъ ухьуз варитIан багьалуб вухьуз, фицики дяви ккудубкIну кIуру гафариз миллионариинди агьал-йир ккилигури гъахьну. Мяълийиъ дупнайиси, му улариин нивгъар алди къайд апIру машквар ву.
Гъалибвалихьна вуйи рякъ гизаф гъагъиб ва ярхиб гъабхьнийи. Ватандин Ахю дявдин йисари Советарин Союздин халкьари зурба игитвал улупну. Думу йисар ихь уьлкейин халкьарин ватанпервервалин, чвевалин, сабвалин заан лишанси Ватандин тарихназ гъубшну.
Уьлкейин вари халкьдиси, Дагъустандин 180 агъзур ватанагьлийири, дявдин садпи йигъарилан хъюгъну, аьхиримжи йигъаризкьан Гъалибвал багахь апIури, Ватандихьна вуйи чпин ккунивал улупну. Дагъустан Республикайин 58 вакил Советарин Союздин Игитар, 7 кас – Машгьурвалин ордендин гьуркIу кавалерар гъахьну, агъзрариинди дагъустанлуйир дявдин жюрбежюр орденариинди ва медалариинди лишанлу дапIна, 80 агъзуртIан артухъ дявдин эскрар гъаних душмандихъди вуйи гъагъи женгариан кьяляхъ гъафундар. Гьадму вахтнан аьдатар давам апIури, дагъустанлуйири гъира чпин Ватандиз вафалувал улупура, дурар Урусатдин Игит ччвурназ лайикь шула.
Аьхю насларин улихь ухьу гьаргандиз буржлу вухьа, дявдин ветеранариз гьар йигъан хъайивал апIурахьа. Аргъаж шулайи наслар Урусатдин азадвал ва асиллу дарувал бадали чпин жанар гьяйиф дарапIдарихьна аьхю гьюрмат ади вердиш апIувал – ихь буржи вуйихь.
Гьяйифки, йислан-йисаз Ватандин Аьхю дявдин иштиракчйир ихь арайиан кам шула. Табасаран райондиъ Ватандин Аьхю дявдин анжагъ сар иштиракчи – Халагъ гъулан агьали Гьясан Ражабов ими, Хив райондиъ думу дявдин иштиракчйир имдар. Гьаддиз Аьхю Гъалибвалин насларин парад тешкил апIуз хъюгъна. Думу жюрейин парад гъабхурайивалиин аьхюдарра, бицIидарра гизаф шад ву.
Ватандин Аьхю дявдин иштиракчйир, ветеранар, вари ватанагьлийир, учвуз Аьхю Гъалибвалин Йигъ мубарак ибшри. Гъит ихь дюн’яйин саб йишваъра дявдин фигъан дарибшри. Учвуз мюгькам сагъ’вал, ислягьвал, хушбахтлу уьмур ккун апIурача.
Газатдин редакцияйин коллектив
* * *
Дагъустан Республикайин зегьметнан ва яшайишдин артмиш’валин министерствойиан туврайи мялуматариинди, Дагъустандин гьюкмари Ватандин Аьхю дявдин иштиракчйириз Гъалибвалин Йигъаз 30 агъзур манат тувди.
«Гъалибвалин Йигъаз бахш вуди, республикайин кIулиъ айидари дявдин гьарсар иштиракчийиз 30 агъзур манат тувбан къарар кьабул гъапIну. Пул 48 ветерандиз тувбанди ву», – дупна мялуматнаъ. Саб ражари туврайи пул дявдин иштиракчйириз ва дявдин инвалидариз тувбанди ву. Думу метлебариз региондин бюджетдиъ 1,5 миллион манат жара дапIна.
Гъийин йигъаз Дагъустандиъ Ватандин Аьхю дявдин 48 иштиракчи ва инвалидар, миржид агъзуриинакьан далу терефнаъ зегьмет гъизигдар яшамиш шула.
