Урусатдин оборонайин министр Сергей Шойгу июндин 8-пи йигъан Дагъустандиз гъафну. Республикайиз дуфнайи хялар вахтназ вуди Дагъустандин Главайин вазифйир тамам апIурайи Сергей Меликовдихъди Каспийскдиъ гьюлин зиълан гъягъру гимйир ерлешмиш шлу йишв’ина гъушну.
Дагъустан Республикайин кIулиъ айирин сайтдиъ дупнайиси, тикилишчивалин ляхнар ккудукIбан кьяляхъ, Каспийин гьюлин гъирагъдиъ гимйир дерккру йишв’ин дявдин 50-тIан артухъ гимйир ерлешмиш апIуз хьибди. Гьамусдиз гьюлин аьтраф убхюрайи кафари ва кьибла терефар гьязур дапIна. Каспийин флотилияйин инфраструктура къайдайиз хувалин гьякьнаан 2017-пи йисан РФ-дин оборонайин министерствойин коллегияйиъ къарар адабгънийи.
Учв дуфну имиди, РФ-дин оборонайин министр республикайин кIулиъ айи Сергей Меликовдихъди штун кIанакк зарарар тувру кьувватарихъди ва дакьатарихъди женг гъабхру 137-пи дестейин урхбанна тренировкйир гъахру базайизра гъушну. Дурар гьюлин кIанаъ ва барокамерйириъ гьюлин хусуси метлеб айи кьушмар гьязур апIбан шартIарихъди таниш гъахьну. Сергей Шойгуйи къайд гъапIганси, хусуси метлеб айи кьушмар гьязур апIруган, гьарсар касдин сагъламвалин, хасиятнан фаркьлу улупбар гьисабназ гъадагъувал лазим ву.
Оборонайин заказ тамам апIувал ахтармиш апIбан бадали, РФ-дин оборонайин министр Сергей Шойгу ва Дагъустандин кIулиъ айи Сергей Меликов Каспийск шагьрин «Дагдизель» заводдизра гъушну.
КIваина хурача, завод дявдинна гьюлин флотдиз штун кIанакк ишлетмиш апIру яракь, гимйирин двигателариз, дизель – электростанцйириз лазим вуйи алатар гьясил апIбан ляхниин машгъул ву. «Дагдизель» заводдин директор Владимир Дудчакди дуфнайи хялариз экскурсия тешкил гъапIну, гьясил апIурайи алатарикан, гележегдиз айи планарикан ктибтну.
Гьацира Сергей Шойгуйи ва Сергей Меликовди флотилияйин гъуллугъчйириз диврайи ва яшайишдин инфраструктура ужу апIуз тикмиш апIурайи дараматарра ахтармиш гъапIну. Миноборонайин идарайин кIулиъ айирин заместитель Тимур Ивановдин гафариинди, Дагъустандиъ оборонайин министерствойи 9 агъзур бицIириз йишв айи бицIидарин 57 багъ ва ясли, 9 агъзур баяр-шубариз йишв айи 16 мектеб тикмиш апIиди. Региондиъ яшайишдин 73 объект тикмиш апIбанди ву, думу кьадарнакан 71-дин гьякьнаан йикьрар йитIна.
