Июндин 7-пи йигъан Дагъустан Республикайин аьтрафариин ерлешмиш духьнайи бицIидарин сагъламвал уьбхбан ва рягьятвал гъадабгъбан хьадан лагерари мектебарин тятIилариъ айи баяр-шубариз чпин раккнар арццну. Хьадан сагъламвал уьбхбан кампанияйин сабпи сменайи шагьрарихьан ярхлаъ айи 25 лагериъ ва 62 мектебарин дахилнаъди арццнайи лагерариъ бицIидар кьабул гъапIну. Сабпи смена 21 йигъан давам хьибди.
Лагерариъ бицIидариз маракьлу программйир, конкурсар, сагъламвал уьбхбан ва спортдин серенжемар, марцци гьавайихь вуйи тамшир ва мастер-классар гъахиди.Лагерариъ бицIидариз маракьлу программйир, конкурсар, сагъламвал уьбхбан ва спортдин серенжемар, марцци гьавайихь вуйи тамшир ва мастер-классар гъахиди.
Мидланра гъайри, жюрбежюр 7 цирклиан гьаржюрейин темйириз тялукь дарсарра гьязур дапIна. Аьдат вуйиганси, жанлу ва гьевескар баяр-шубар Юнармияйин ва РДШ-йин жергйириз кьабул апIиди.
Гъябгъюрайи йисан хьадан сагъламвал уьбхбан кампанияйиъ дагъустандин мектебариъ урхурайи 19 агъзур баяр-шубари рягьятвал гъадабгъиди.
РД-йин образованиейин ва илимдин министерствойин аьлава образованиейин артмиш’валин отделин начальник Лариса Калмыковайи къайд гъапIганси, хьадан вахтна бицIидарин сагъламвал уьбхбан кампания образованиейинна илимдин министерствойин ляхнин важиблу паярикан саб ву. БицIидарин сагъ’вал мюгькам апIбахъди сабси, министерствойин вакилари баяр-шубари рягьятвал гъадабгъбаз ва дурарин хатIасузвал уьбхбазра аьхю фикир тувра. Гъябгъюрайи йисан, санитарвалин цIийи тIалабариин биналамиш духьну, шагьрарихьан ярхлади ерлешмиш духьнайи лагерариз лазим вуйи кьадарнакан 75%, хъа мектебарин бинайиин арццнайи йигъандин лагерариз – 100% баяр-шубар кьабул апIиди.
Къайд апIуз ккундучуз, Дагъустан Республикайиъ бицIидарин ва живанарин сагъламвал мюгькам апIбаз ва дурари рягьятвал гъадабгъбаз гьюкуматдин терефнаан улупнайи кюмек тувра: лагерариз путевкйир пулсузди ву, дурар МФЦ-йиан гъадагъуз шулу.
Табасаран райондин МФЦ-йин оператор Заира Гьяжимуталимовайи ич сюгьбатнаъ къайд гъапIганси, райондиан сабпи этапдиъди чпин баяр-шубар хьадан лагерариз гьауз путевкйириз илтIикIдар 4 кастIан дар. Шубур бицIир Къарабудагъкент райондин «Парус» ва сар бицIир УнцIукIул райондиъ ерлешмиш дубхьнайи «Данко» лагерариз гъушну. Кьюбпи ва шубубпи сменайиъ чпин бицIидар лагерариз гьауз ккуни абйир-бабарихьан пулсузди вуйи путевкйир бадали МФЦ-йиз илтIикIуз шулу.
Хив райондиан сабпи сменайиз анжагъ кьюр бицIиртIан гъушундар.
«Кьюбиб путевкйирра гъадагъу бицIидар Къарабудагъкент райондин «Солнечный берег» лагериз гьаунча. Гьеле путевкйир ими. ИкибаштIан, уьмрин гъагъи аьгьвалатнаъ ва льготйир айи хизанарин жюрейик кахьрайи бицIидариз путевкйир пулсузди ву. Мидланра гъайри, саб кьадар путевкйир аьдати бицIидаризра пулсузди улупна. Улихь гьеле кьюбсан смена хьми. Думу вахтна ихь ватандашар пулсузди вуйи путевкйир гъадагъуз сацIиб гьялак шул кIури, миж кивраза»,
– гъапну Хив райондин МФЦ-йин пишекар ФатIима Рамазановайи.
