Учу «Табасарандин нурар» газатдин машариъ чап апIурайи макьалйириъ швнуб-сабан мялум гъапIганси, 2021-пи йисан ЕГЭ кьюб этапдиъди кIули гъябгъиди. ЕГЭ-йин асас вахт 31-пи майдиан 25-пи июндиз ву. Резервдин вуди 28-пи июндин ва 2-пи июлин йигъар улупна. Имтигьнариз жара дапIнайи аьлава серенжемар 12-пи июлиан 17-пи июлиз кIули гъягъиди. Му йигъари урус чIалнан ЕГЭ-йиан кьюб гъадабгъдари ва жюрбежюр чарасуз себебариан асас вахтна ЕГЭ-йиз дарфидари имтигьнар тувру. Республикайиъ ЕГЭ-йин кампания фици гъябгъюраш, исихъ жикъи мялуматар туврача.
Сабпи имтигьян
Майдин 31-пи йигъан сабпи имтигьян гъабхуз Дагъустандиъ 59 пункт тешкил гъапIнийи. Му йигъан имтигьнариъ республикайин 4873 выпускник иштирак гъахьну. Дурарикан 4342 выпускникди химияйиан, 410 касди – литературайиан ва 121 выпускникди – географияйиан ЕГЭ тувну.
Математика
Июндин 7-пи йигъан вари Урусатдиъ мектебарин выпускникари математикайиан пишекарвалин дережайин ЕГЭ тувнийи. 2021-пи йисан бинайин, яна пучIу дережайин математикайин ЕГЭ тутрувбан ихтияр адабгънийи, ва цци думу имтигьян чарасуз вуди тувну ккунидарин гьисабнаан адабгъна. Математикайиан пишекарвалин дережайин имтигьян анжагъ «математика» ккун апIурайи вузарик урхуз кучIвуз ният айи выпускникаритIан тувундар.
Дагъустандиъ математикайиан ЕГЭ тувдарин кьадар – 3337 выпускник ву. Натижйир июндин 23-пи йигъаз мялум хьиди.
Урус чIал
Урус чIалнаан ЕГЭ тувуз Дагъустандиъ 62 пункт мектебарин бинайиинди ва сагъ’валихъди аьлакьалу вуди хулаъ гъузуз мажбур вуйидариз 6 пункт хусуси хулариъ тешкил гъапIнийи. Думу имтигьян, ухьуз мялум вуйиганси, 3-4-пи июндиъ кIулиъ гъубхну. Сабпи йигъан урус чIалнаан ЕГЭ тувуз 8730 выпускникди кагъзар ацIну, хъа 4-пи июндиъ му имтигьниз гъафидарин кьадар 1900 кастIан артухъ вуйи. Му имтигьян вуздик кучIврайи вари выпускникари тувну.
Къайда чIур апIувал
КIваин апIуз ккундучуз, гъубшу йисан Мягьячгъала шагьрин 56-пи нумрайин гимназияйиъ ЕГЭ гъябгъюрайи вахтна къайда чIур апIбан дюшюшар гъахьнийи. Дурар аквар ктIушвбахъди, интернетдин аьлакьа дубгувалихъди аьлакьалу вуйи. Гъябгъюрайи йисан му гимназияйиз вахтназ вуди РД-йин образованиейин ва илимдин министрин вазифйир тамам апIурайи Ягь’я Бучаев гъафнийи. Амма, сачси, ццира, къайда чIур апIури, гвачIниан аквар ктIуршвбахъди ва техника дилибхбахъди аьлакьалу камивалар арайиз гъафнийи. Имтигьян ккебгъайиз, Ростелекомдин пишекрари ва техникайихъди аьлакьалу цирклихъан жавабдар вакилари, камивалар вахтниинди арайиан адагъну, видеотрансляция къайдайиз гъабхну ва имтигьян ачухъди гъубхну.
Къайд апIуз ккундучуз, гьарсаб ЕГЭ Рос-потребнадзорин тIалабариин биналамиш духьну кIули гъабхура: имтигьян гъабхру йишв дизинфекция апIру сурсатарихьди тартиб апIура, тешкилатчйири ва гюзчивал гъабхрудари маскйир алахьна, сар-сарин арайиъ 1,5 метр манзил уьбхюра ва гь.ж.
Имтигьнар ккудукIнадар
Аттестат гъадабгъбан бадали, выпускникари урус чIалнан ЕГЭ-йиан асккан гьисаб 24 балл гъадагъну ккунду, хъа заан аьгъюваларин аттестатдиз 70 ва артухъ балл лазим ву, мидланра гъайри, жара имтигьнариан асккан баллин кьадарналан улдучIвну ккунду.
Урус чIалнан имтигьнин натижйир июндин 22-23-пи йигъари мялум хьиди. ЕГЭ-йин кампания давам шула. Учу имтигьнарин тешкиллуваликан, хъасин натижйирикан мялуматар тувдича.
Гьамусяаьт выпускникар июндин 11-пи йигъан кIули гъягъру тарихнан ва физикайин, 15-пи июндиъ – обществознаниейин ва дидин кьяляхъна вуйи имтигьнарихьна гьязур шула. Дурариз ужудар баллар ва кIван мурадарихъ хъуркьувал ккун апIурхьа.
