Гъубшу йисан Дагъустандиъ коронавирусдин уьзрин тIягъюн абхъбакан мялум дапIну саб ваз гъябгъяйизра, думу уьзур республикайиъ гьяракатниинди тарабгъуз хъюбгънийи.
Дагъустан читин аьгьвалатнаан адапIбан бадали, республикайиъ Урусатдин оборонайин министерствойи больницйир тикмиш гъапIнийи, гьяракатниинди саб йишвлан жара йишв’ина гъахуз шлу госпиталар гьатIарццнийи, Урусатдин медицинайин аьхю клиникйириан ужудар духтрар дуфну, региондин духтрариз, агьалйириз уьзрихъди аькси женг гъабхуз зурба кюмек тувнийи.
2020-пи йисан хьад улубкьган, аьзарлуйирин кьадар цIиб гъабхьнийи, амма чвлин вахтна коронавирусдиан аьзарлу шулайи инсанарин кьадар хъана артухъ хьуз хъюбгънийи. Коронавирусдихъди аькси женг гъабхурайи Гьяракатнан штабдин улупбари инсанарин кIваз затра рягьят хьуз гъитрадайи.
Уьзриз аькси дарман абгурайи вирусологарикан Урусатдин аьлимари сабпидарди «Cпутник-V» вакцина адабгънийи. 2020-пи йисан декабрин вазлихъан мина агьалйириз думу вакцинайин рубар йивуз хъюгъну. Гьадму вакцинайин рубар гъивган, инсандин бедендиъ му къурхулу уьзрихъди аькси женг гъабхбан кьувват артухъ шулу. Амма ихь агьалйириз гьапIуз-вуш вакцинайин рубар йивуз ккундар. Хъа, гьяйиф.
Июндин 17-пи йигъаз вуйи улупбариинди, вари республикайиъ аьзарлу гъахьидарин уьмуми кьадар 34471 кас ву. Хъа аьхиримжи йигъан ва йишван 57 кас аьзарлу гъахьну. 16-пи йигълан 17-пи йигъаз вуйи вахтна 2 кас гъийихну.
Дагъустандин сагъламвал уьбхбан министерствойи коронавирусдиан аьзарлу духьнайидар ккауз больницйириъ дахъру йишвар 250-риина артухъ дапIна.
Министерствойин кIулиъ айи Тятьяна Беляевайи къайд гъапIганси, гьамусяаьт республикайин больницйириъ коронавирусдиан аьзарлу духьнайидариз дахъру 1341 йишв а. Аьлава йишвар республикайин сарикан тмунурикна тарагъру уьзрарин центриъ ва Мягьячгъалайин клиникайин больницайиъ гьязур дапIна. Гъийин йигъаз республикайин больницйириъ коронавирусдин ва гьадму жюрейин гъурдларин уьзур кади 1107 кас ккаъна.
Гьюрматлу ватанагьлийир! КIваин апIурача, аьзарлуйирин кьадар артухъ хьувал дебккбан саб рякъ а – вакцинайин рубар йивувал. Рубар йивру пунктар гьарсаб шагьриъ, райондиъ ачмиш дапIна, гьацира рубар йивру бригадйири, саб йишв’ан тмунуб йишваз гъягъюри, ляхин апIура.
