Цци ихь уьлкейиъ Гъалибвалин 76 йис тамам хьувал лапра яркьуди къаршуламиш гъапIнийи. Шагьрариъ ва гъулариъ хайлин серенжемар кIули гъушну, гьадму гьисабнаан Ватандин Аьхю дявдин иштиракчйириз бахш дапIнайи ядиграр дивбан серенжемарра. 22-пи июндиъ ФуркIил гъулаъра Ватандин Аьхю дявдин иштиракчйириз ядигар ачмиш апIбан аьхиримжи гьяракатар гъягъюрайи.
Думу йигъан гъулан кьабидар, жигьилар ва бицIидар цIийиди тикмиш дапIнайи ядигарихъна уч духьнайи. Гъул’ан жара йишвариз удучIвну душнайидар, чпихъди хяларра хъади, серенжемдиз шадвал пай апIуз дуфнайи.
Табасаран райондин глава Мягьямед Къурбанов кIули айи делегация хъубкьубси, серенжем мектебдиъ урхурайидари ачмиш гъапIнийи. «Гьаму вахтнан хайир ибшри, гьюрматлу хялар ва гъуландар! Гъи ич ФуркIил гъулаъ гъябгъюрайи, Ватан уьбхюри дявдиъ гъийихдариз дивнайи ядигар ачмиш апIбан серенжемдиъ учву кьабул апIуз учу рази вуча. 1941-1945-пи йисари, Ватан уьбхбан бадали, дявдин кьушмарин жергйириз ФуркIил гъул’ан 25 кас гъушнийи, дурарикан 5 кастIан кьяляхъ гъафундайи.
Гьюрматлу гъийин серенжемдин иштиракчйир, дявдиъ чпин жанар диву, ФуркIил гъул’ан вуйи игитариз дивнайи ядигар ачмиш апIурхьа. Гьамус вари Урусатдинна Дагъустандин гимнарихъ хъпехъидихьа», – илтIикIнийи дурар уч духьнайидарихьна. Хъасин саб дакьикьайиъ ккебехъну дийигъбиинди Ватандин Аьхю дявдин йисари ва кьяляхъна гъийиху ветеранарин яс гъюбхнийи.
Мяракайиъ удучIвну улхури, Табасаран райондин глава Мягьямед Къурбановди гъапнийи: «Ав, дявдин читинвалар аьгь дарапIу хизан ихь уьлкейиъ, гьадму гьисабнаан табасаранлуйирин арайиъра, гъубзундар. Ватандин Аьхю дявдиъ Табасаран райондиан 4000-тIан артухъ касар иштирак гъахьну. Чпик кайи гьунарар улупну, дурари, багъри Ватан уьбхбан бадали, чпиз табшурмиш гъапIу вазифйир намуслувалиинди тамам гъапIну. Гьаддиз дявдиъ эскрари, дявдин далу терефнаъ – зегьметкешари улупу гьунарар кIваин уьрхювал ва дурарикан ихь веледариз, худлариз ктибтувал важиблу вухьуз», – аьлава гъапIнийи дугъу.
Мяракайиъ удучIвну гъулху ФуркIил гъулан агьали Мягьрам Аьбдурягьмановди гъябгъюрайи серенжем шадвалинубси, пашманвалра кайиб вуйиваликан гъапнийи: «Халкьдин гьунарну ва гъазанмиш гъапIу Гъалибвали кIваъ шадвалин гьиссар ачмиш апIура, хъа дявдиан кьяляхъ дарфидарикан кIваин апIбари пашман хьуз гъитра».
Мягьрам Аьбдурягьмановди совет эскрари фашист чапхунчйирихъди вуйи дявдин женгариъ Баб-Ватан бадали улупу гьунарарикан, кьабидари, дишагьлийири ва яшнакк ккуркьну адрудари, гьадму гьисабнаан ФуркIил гъулан агьалйири, далу терефнаъ гъизигу зегьметнакан ктибтнийи. Дугъу гьацира ФуркIил гъул’ан Ватандин Аьхю дявдиз гъушу къанна хьур касдин ччвурарра ктухнийи, дурар фуну тухмиан вуш ва дурарин наслар фужар вуш, гъапнийи.
УдучIвну улхуз гаф серенжемдин тешкилатчи, Табасаран райондин электросетдин начальник Багьаудин ТIагьировдизра тувнийи. Чан улхбаъ дугъу учв ФуркIил гъулан агьали вуйивалиинди дамагъ апIурайиваликан, му гюмбет аку гележег бадали чпин жанар гьяйиф дарапIу эскрарин, аьхю зегьмет гъизигу гъуландарин гьюрматназ дивнайиваликан гъапнийи. «Гъюзимбу насларик ватанпервервалин лишнар тербияламиш апIбаъ мицдар серенжемари уйнамиш апIурайи роль аьхюб ву», – къайд гъапIнийи Б. ТIагьировди.
Дугъу дявдин иштиракчйирин наслариз, далу терефнаъ ляхин гъапIдариз, серенжем гьязур апIуз кюмек тувдариз чан терефнаан аьхю чухсагъул мялум гъапIнийи.
Дупну ккундуки, Багьудин ТIагьировди дявдин иштиракчйириз бахш дапIнайи ядигар чпин хизандин хусуси дакьатарихъ тикмиш дапIнайиб ву.
Мициб серенжем тешкил апIбаз лигну, ФуркIил гъулан жямяаьтди ТIагьироварин хизандиз аферин мялум гъапIнийи.
Серенжемдиъ гьацира ТинтIарин, Турфарин ва ФуркIларин мектебарин мялимарра, урхурайидарра иштирак гъахьну. Дурари дявдикан вуйи шиърар гъурхну, театрин сягьна улупну ва мяълира гъапIну.
Серенжемдин аьхириъ уьру лента гьадабтIнийи ва дуфнайи хялари, гъулан яшлу касари ва гъуландари ядигарихъ кюкйир дивнийи.
