Июндин 19-пи йигъан Москвайиъ «Саб вуйи Урусат» партияйин 20-пи съезд кIули гъубшну. Съезддин ляхниъ Урусатдин Президент Владимир Путинди, партияйин председатель Дмитрий Медведевди, партияйин регьбервал гъабхурайидари, регионарин кIулиъ айидари, регионарин отделенйирин секретарари, съезддин делегатари иштирак’вал гъапIну.
Дагъустандин терефнаан съезддиз вахтназ вуди Дагъустандин Главайин вазифйир тамам апIурайи ва «Саб вуйи Урусат» партияйин региондин отделениейин секретарь вуйи Сергей Меликов ва партияйин ерли отделенйирин терефнаан кадагънайи 26 делегат гъушнийи.
Съезддиъ Государствойин Думайиз вуйи сечкйириъ иштирак шлу кандидатарин сиягьар тасдикь ва сечкйириз улихьна вуйи программайин асас терефар тяйин гъапIнийи. Учу думу съезддин делегат, РД-йин Халкьдин Собраниейин депутат, «Фирма АС компанйирин десте» ООО-йин президент, Урусатдин промышленностдин карханйирин эйсйирин ва алверчйирин Союздин Дагъустандин отделениейин кIулиъ айи ихь ватанагьли Сефер Аьлиевдихьна, съезддин гьякьнаан чан фик-рар ачухъ апIувал ккун апIури, илтIикIунча. Дугъу учуз туву мялуматар исихъ чап апIурача.
«Саб вуйи Урусат» партияйин сечкйириз улихьна вуйи программайин бинайиъ ватандашарин уьмрин дережа за апIувал тIапIна. Съезддиъ уьлкейин Президентди вари жюрейин цирклариъ гъитIиркку месэлйирин гьякьнаан регионариъ хъайи-хъайиси ляхин гъабхувализ мумкинвалар ачмиш апIиди. 20-пи съезддин сабпи пайнан натижйир йивури, къайд апIувал лазим вуки, партияйин терефнаан вуйи кандидатарин состав гизаф дигиш гъабхьну: сиягьариъ цIийи инсанар-волонтерар, жямяаьтлугъдин, яшайишдин циркларин вакилар а. Партияйин кандидатарин сиягьар арайиз хуз вахт ккимиди сесер туву инсанари кюмек гъапIну. Съезддиъ удучIвну гъулху Владимир Путинди уьлкейин Президентдин Послание уьмриз кечирмиш апIбак «Саб вуйи Урусат» партияйи киву асас пайнакан гъапнийи. Уьлкейин кIулиъ айири «Саб вуйи Урусат» агьалйирин яшайишдин гъаразнаъ айи партия вуйивал къайд гъапIнийи.
Урусатдин Президентди багахь йисари бицIидар хъайи хизанариз, жигьилариз кюмек тувбан, сагъламвал уьбхбан циркил къайдайиз хувалин региондин программйир, кадрйирин гъурулуш къайдайиз хувалин месэлйир сабпи йишв’ин духьну ккуниваликан гъапнийи. Сагъламвал уьбхбан гъурулуш технология жигьатнаан цIийи алапIувализ, поликлиникйирин, больницйирин ляхнин тешкиллувал ужу апIуз 550 миллиард манат жара апIбанди ву.
Владимир Путинди кьюр вая шубур бицIир хъайи хизанди квартира масу тувиган, гьаддилан гъюрайи гъазанждиин налог илилипуз теклиф гъапIну. Гьадму жюрейин теклифари жигьил хизандин яшайишдин шартIар къайдайиз хуз кюмек тувди. Гьаму ва жара теклифар регионаризра кайидар вуйивали ухьу рази дарапIди гъитрадар.
Владимир Путинди Правительствойиз багарихьди гъюрайи 5 йисандиъ арайиъ мектебариъ дибдиан расвалин ляхнар гъахбан программа гьязур апIуз табшурмиш гъапIну.
Регионариз аьлава вуди рякъяр рас апIуз 30 млрд манат ва чиркин шид марцц апIру дараматар дивуз 150 млрд жара апIурайиваликанра гъапну.
Съезддиъ учу уьлкейин Президентди Федералин Собраниейихьна вуйи чан Посланиейиъ улупнайи месэлйир бинайиъ дивнайи сечкйириз улихьна вуйи программа тяйин гъапIунча. Гьамус думу программа регионариъ гьял дапIну ккунду – дигиш’валар тIауз ккунидарихьан чпин тек-лифар арайиз адагъуз шулу. Гьаддиз программа халкьдин иштирак’валиинди арайиз хурайиб ву, пуз шулу. Думу программайин асас пай инсанариз хъайивал апIбаз, дурар уьрхбаз бахш дапIна. Асас фикир инсанариз кюмек тувбаз, инсандихьан чан сагъламвал за апIуз удукьру шартIар яратмиш апIувализ, образованиейин циркил къайдайиз хувализ, экологияйин месэл-йириз, сар касдикан тмунурикна тарабгъру уьзур арайиз гъафихъан мина ухьуз алахьурайи читинвалар гьисабназ гъадагъну, зегьметнан ихтиярар уьрхювализ тувди.
Сечкйириз улихьна вуйи программайин мяналу пай экономикайиз, бицIи ва кьялан бизнесдиз, промышленностдин цирклиъ цIийивалар тIаувализ кюмек тувбаз бахш дапIна. «Саб вуйи Урусат» партияйин 20-пи съезд читин вахтна кIули гъябгъюра. Гьаддиз кьабул апIурайи къарарарин важиблувал заануб ву.
Уьлкейин Президентди удучIвну улхуб уьмрин вари цирклар дидиснайи ужудар теклифари абцIнайи.
Улихь месэлйир дивна. Жигьилар, метлебарихъ хъуркьуз ккунидар, вижнасузвал ктру, ляхнихьна жавабдарвалиинди янашмиш шлу инсанар жалб дапIну, съезддин къарарар уьмриз кечирмиш апIури, ляхин гъабхидихьа»
– мялум гъапIну Сефер Аьлиевди.
