Айгуль Мягьямедова
1-пи апрелиъ Урусатдиъ хьадукран призыв ккебгъну. Аьхиримжи 14 йисандин арайиъ гьаму призыв варитIан яркьуб хьибди. Президент Владимир Путинди къул дизигнайи ва 1-пи апрелилан 15-пи июлизкьан давам шлу хьадукран призывдин гьякьнаан вуйи указниинди, армияйиз 18 йислан 30 йис’ина яшар духьнайи 160 агъзур жигьил баяриз дих апIиди.
Президентдин указдин кьяляхъди Урусатдин оборонайин министр Андрей Белоусовдира хьадукран призывдин гьякьнаан вуйи приказдиин къул гъизигну.
2012-пи йисхъанмина призывдин компанияйин дахилнаъди 155,5 агъзур жигьил баяризтIан дих апIури шулдайи. 2024-пи йисан хьадукран призывдин вахтна 150 агъзур баяр армияйиз гъушнийи. Думуган, Госдумайин оборонайин комитетдин председателин заместитель Андрей Красовди къайд гъапIганси, Москвайин ва Ленинграддин областариъ военный округар ккатIарццбахъди аьлакьалу вуди призывникарин кьадар яркьу апIуз шлуваликан гъапнийи. 2024-пи йисан чвлин призывдин вахтна армияйиз 133 агъзур жигьилар гъушнийи.
Хьадукран призыв, уьлкейин лап кафари терефнаъ айи 54 район ктарди (табиаьтдин гьавйириз дилигну, думу районариан чвлин призывдин вахтнаътIан жигьилариз армияйиз дих апIури шулдар), Урусатдин вари регионариъ кIули гъябгъиди.
Улихьнаси гьамусра жигьилар 12 вазли военный гъуллугънаъ хьиди. Гъулугънан вахт призывдикк ккуркьнайи жигьилар призывдин пунктназ гъафи ва звание туву йигълан гьисаб апIуру. Генеральный штабдиан мялумат тувганси, призывдин пунктариз уч гъахьи баяр 10-пи апрелихъан чпи гъуллугъ апIру йишвариина гъахуз хъюгъди.
Армияйиз гъягъюрайи баяриз банкдин ва электрондин хусуси картйир, несессерар (лазим вуйи жвилли шей’ар ивру бицIи сумкйир) тувди. «Регионарин вари военный комиссариатариъ призывникариз лазим вуйи вари алатар гьязурди а. Вари складариз ипIрубра, алабхьрубра дубхна» – кIура мялуматнаъ.
Шубуб пайнакан саб пай призывникар 5 вазлизди гьаму деврин военный техникайихъди таниш апIру ва дявдинна гьисабнан пишекарвал тувру частариз гьаъди. «Урхуб ккудубкIбан кьяляхъ, айи аьгъювалариз дилигну, дурар уьлкейин жа-жара кьушмарин дахилназ гъягъиди», – гъапну Генштабдин мобилизацияйинна тешкиллувалин кIулин управлениейин начальникдин заместитель Владимир Цимлянскийи.
10-пи апрелихъан хъюгъну, военный гъуллугъназ гъягърударин призывдихъди аьлакьалу вуйи суалариз жавабар туври, «горячая линия» ляхник кипди.
РФ-дин оборонайин министерствойи туврайи мялуматариинди, хьадукран призывдин кампания Украинайиъ гъабхурайи хусуси метлеб айи дявдин операцияйихъди аьлакьалу дар. Призывникар ДНР-иъ, ЛНР-иъ, Херсондин ва Запорожьейин областариъ ерлешмиш духьнайи Яракьлу кьувватарин подразделенйириз гьаидар.
Генеральный штабдиан туврайи мялуматариинди, 2025-пи йисандин хьадукран призывдин вахта гьюкуматдин мялуматарин гъурулуш ишлетмиш апIиди, яна кагъзин повесткйирихъди сабси электрондин повесткйир хътаиди. Электрондин повесткйирра «Госуслуги» порталиъ ватандашдин хусуси кабинетдиз гъиди.
РФ-дин Госдумайи призывдин гьякьнаан хайлин цIийи теклифар дивна. Амма думу теклифар кьюбпи ва шубубпи урхбаъди кьабул дапIнадар, гьаддиз теклифар сабан кьувватнаъ учIвнадар.
