Дагъустан Республикайиз Дербент шагьрин кьялан больницайиз медицинайин лазим вуйи алатар, шей’ар, авадлугъар масу гъадагъуз 143,4 млн манат жара апIбанди ву. 5-пи июлиъ гьаму месэлайин гьякьнаан вуйи табшуругъниин РФ-дин премьер-министр Михаил Мишустинди къул гъизигну.  

 

Федералин центриан вуйи му пулин кюмекниинди гьаму йисан больницайиз рентгендин мобильный аппарат, гьамусдин деврин тIалабариз жаваб тувру хирургарин алатар ва операцйир апIру цIийи столар масу гъадагъиди.

Му цIийи алатари аьзарлу касариз заан технологияйин медицинайин кюмек тувуз, ва гьацира кIванна табарин ва дюгьбарин уьзрар сагъ апIбаъ хирургарин ляхнин ери мюгькам апIуз мумкинвал тувди.

Гьаму йисан апрелин вазлиъ Дагъустандиз гъафиган, Михаил Мишустин, Дербентдин кьялан больницайизра гъушнийи. Аьзарлуйир кьабул апIру отделениейиз дилигну, думу больницайин операцйир апIру блокдиъ кIули гъахурайи рас апIбан ляхнарихъдира таниш гъахьнийи. Хъасин идарайин кIулиъ айирихъди больница лазим вуйи цIийи алатарихъди ва авадлугъарихъди тямин апIбан гьякьнаан сюгьбат гъубхнийи. «Вари лазим вуйи алатар мина хиди», — гаф тувнийи думуган премьер-министри.

Натижайи чаз ккилигуз гъитундар. Дагъустандиан кьяляхъ хътакубси, дугъу РФ-дин сагъламвал уьбхбан, финансарин ва экономикайин артмиш’валин министерствйириз резервдин фонднаан гьаму метлебариз 150 млн манат жара апIбан гьякьнаан вуйи документдин проект Правительствойиз хътапIуб табшурмиш гъапIнийи.