2020-пи йисан хабарсузди ачмиш гъабхьи COVID-19 уьзрин къурхулувал гъира яваш дубхьнадар. РД-йин сагъламвал уьбхбан министр Татьяна Беляевайи республикайин гьяракатнан штабдин заседаниейиъ мялум гъапIганси, июлин вазлин 1-6-пи йигъари республикайин ковид-госпиталариъ 99 кас гъийихну.
«Коронавирусдиан инсанар йихувал сабпну лап гизаф дубхьна. Гьаму цифрйири аьхю гъалабулугъвал кипра. Гьаму йисан уьзур гъизгъин дубхьнайи вахтна, вари апрелин вазлиъ гъийихдарин кьадар гьамциб вуйи, хъа гъи – 6-д йигъандин арайиъ», — къайд гъапIну министри.
Дугъан гафариинди, республикайиъ аьхиримжи саб суткайиъ, пневмония уьзур ачмиш дубхьну, 468 кас больницйириъ каъну. 6-пи июлиз республикайин стационарариъ думу уьзриан аьзарлу духьнайи 3620кас ккаъна.
Гьаддихъди сабси, министри республикайиз хусуси вакцина лазим вуйи кьадарнаъди хурайиваликан гъапну. Прививкайин рубар гъивдар вари Урусатдин сагъламвал уьбхбан министерствойин гюзчиваликк ккайи хусуси регистриъ тIаъра.
Къайд апIуб лазим вуки, аьхиримжи вахтна халкьдин арайиъ коронавирусдиз аьксиди рубар йивувалихъди аьлакьалу вуйи жюрбюжер улхбар-рахбар ерхьура. Саспидар – фагьумлу инсандихьан зат хъугъузра даршлудар. Бязидари кIуруш, къанундиинди чарасуз вуди рубар йивуб тIалаб апIуз ихтияр адар, кIура. Гьаму суал улихьна йигъари Урусатдин Президент Владимир Путиндихъди кIули гъубшу прямой линияйиъра тувнийи.
Дидиз жаваб вуди, РФ-дин Президентди гьамци гъапнийи: «Къанундиинди му месэлайиз кьюб терефнахъанди лигуз шулу. Сабпиб, ав, 1998-пи йисан кьабул дапIнайи къанундиъ, чарасуз вуди рубар йивбан календариъ, гьелбетда, коронавирус улупнадар. Кьюбпиб, эгер эпидемияйихъди ьлакьалу аьгьвалат пис шули гъабхьиш, кIулин духтрарин табшуругъниинди, регионарин кIулиъ айидари втанагьлийирин бязи гъатариз чарасуз вуди рубар йивувал тIалаб дапIну ккунду».
Ухьуз рябкъюрайиганси, гъи республикайиъ му уьзриан инсанар ктIерццбан гьял лап читин дубхьна. Гьаддиз, гьюрматлу ватанагьлийир, ухьуз гъубзрайиб, фагьумсуз улхбариз фикир тутрувди, духтрихьна илтIикIну, жвуван иццрушнарикан хабардар дапIну, духтрин гюзчиваликкди му уьзриз аькси рубар йивувал ву.
