Дагъустандиъ зир-зибил, хъархъас уч апIбан, думу гатIабхьбан, шагьрар-гъулариан адабгъбан месэла яваш-явашди гьял апIуз хъюгъна. Гьаму йисан эвелиъ Мягьячгъалайиъ думу цирклиъ ляхин тешкил апIбаан арайиз гъафи камивалар республикайин ва меркездин кIулиъ айидарин, муниципалитетарин агьалйирин, волонтерарин кюмекниинди гьял апIуз мумкинвал гъабхьнийи. Амма албагнайи ляхин саб дупну чIур хьузра мумкинвал гъубзра. Гьаддиз хъархъас уч ва думу тартиб апIбан месэлайи гьаммишан дикъатлу фикир тIалаб апIура.
Мягьячгъалайиъ РД-йин Правительствойин Председатель Аьбдулпятягь Амирхановдин иштирак’валиинди кIули гъубшу, «Дагъустан Республикайиъ хъархъас марцц апIбан цирклиъ реформа гъабхбан важиблу месэлйир» ччвур тувнайи конференцияйи ТКО-йин цирклиъ айи месэлйириин дийигъуз ва дурар гьял апIбан рякъяр агуз мумкинвал тувну.
Дагъустандиъ хъархъас тартиб апIбан инфраструктура артмиш дарували ужудар натижйирихъна гъюз гъитрадар. Конференцияйиъ къайд гъапIганси, республикайин аьтрафариин хъархъас тартиб апIру дараматар дивбан концепция гьязур апIура. Думу концепция гьаму йисан чвлин вахт улубкьайиз гьязур хьибди. РД-йин Правительствойин ва «Урусатдин экологияйин оператор» ППК-йин арайиъ аьлакьйир уьрхбан «рякъюн картайиин» къулар дизигна. Региондин компанияйи «РЭО» ППК-йихъди сатIиди зир-зибил тартиб апIру объектар тикмиш апIиди. Урусатдин экологияйин оператори проект уьмриз кечирмиш апIбан харжарин саб пай чаина гъадабгъура, думу ляхни региондин бюджетдиз айи читинвалар цIиб апIиди. 2021-пи йисан чвлиз ужуди ляхин апIру региондин оператор ктагъбан конкурсдин серенжемар кIули духну ккудукIиди.
Премьер-министри месэлайихьна муниципалин образованйирин администрацйирин терефнаан дикъатлу фикир тIалаб гъапIну.
«Муниципалин образованйирин главйирикан ляхнихъ жанлуди хъюгъювал ккун апIураза. СатIи вуйи ляхни табиаьт чиркин дарапIбан ужудар натижйирихъна хиди», ‒ гъапну Аьбдулпятягь Амирхановди. Гьаддихъди сабси, хъархъас адабгъбахъан тувру гьякьи за дапIну даккниваликанра кIваин гъапIну.
Правительствойи кьабул апIурайи уьлчмйири ихь республикайин экологияйин аьгьвалат къайдайиз хуз мумкинвал тувди.
Конференцияйиъ удучIвну гъулху РД-йин Муфтиятдин вакил Шамил Аьлихановди къайд гъапIганси, дюн’яйин вари динари марццишин уьбхювал ккун апIура. «Табиаьтдихьна гьюрмат ади янашмиш хьуваликан, марццишин дюбхну ккуниваликан Гирами Кьур’андин гизаф аятариъ дупна», — гъапну муфтиятдин вакили.
Къайд апIувал лазим вуки, гьюкуматди чан терефнаан фукьан къарарар кьабул гъапIишра, ухьу гьарсари жвув яшамиш шулайи йишваъ марццишин дюрюбхиш, табиаьт чиркин хьибди. Жвуван багахь хьайи аьтраф жвуван гьяятси марцциди уьбхюз дубгъувал чарасуз лазим ву. Эгер ухьу ихь веледариз гьадму ляхин улупиш, табиаьтди ухьуз чухсагъул пиди.
