Багъри миллетдин вакиларин хъуркьувалари, дурар уьлкейин фунуб пIипIнаъ яшамиш шулашра, учу гьарган рази апIуру. Улихьнаси саб гьациб шадлугънан хабар учухьна Краснодарский крайдиан гъафну – ихь ватанагьли Сулейманова Гюльмирайи Кубандин Гьюкуматдин университет уьру дипломдиинди ккудубкIну.

 

 

Сулейманова Гюльмира Зульфикьаровна 1999-пи йисан 26-пи декабриъ Костромской областдин Галичи кIуру шагьриъ бабкан гъахьну. Дугъан хизандин бина Табасаран райондин ЦIанак гъул’ан ву. Думу тIюргъярин худулра ву. Гьамусяаьт Гюльмира Сулейманова Краснодарский крайдин Беднягино кIуру хуториъ яшамиш шула.

2017-пи йисан 25-пи июндиъ Краснодарский крайдин Тимашевский райондин Беднягино хуториъ айи 8-пи нумрайин кьялан мектеб ккудубкIну, дугъу уьру аттестат ва медаль гъадагъну.

2021-пи йисан 6-пи июлиъ Гюльмира Сулеймановайи Краснодар шагьриъ айи Кубандин Гьюкуматдин университет уьру дипломдиинди ккудубкIну. Университетдиан дугъан бабан терефназ гьамциб кагъаз дуфна:

«Гьюрматлу Гюльбагьар Тагъудиновна! Кубандин Гьюкуматдин университетдин администрацияйи ва профессораринна преподавателарин коллективди увуз, гьамцир ужур риш вердиш апIбаз, аьхю чухсагъул мялум апIура. Сулейманова Гюльмира Зульфикьаровнайи чан урхуб заан хъуркьувалариинди ккудубкIну.

Гьаму йисарин арайиъ яв веледдикан зегьмет зигуб тIалаб апIури, дугъахьди чан кIул’инди урхуз гъитувализ, увуз аьхю чухсагъул.
Увуз, яв албагу хизандиз аьхю хъуркьувалар, жандин сагъ’вал ишри.

Увухьна гьюрмат ади, «КуБГУ» ФГБОУ ВО-йин Славянск шагьриъ айи филиалин директор О.В.Леусь».

 

Кубандин Гьюкуматдин университетдиъ психологвалинна педагогвалин образованиейин факультетдин бакалаврин дережа гъадабгъу жигьил пишекар ляхниъ дийигъуз Табасаран райондиз гъюбанди ву.

 

Шиклиъ: Гюльмира Сулейманова абйир-бабарихъди.