Урусатдин Федерацияйиъ почтайин Йигъ къайд апIури, 28 йис ву. Советарин гьюкуматдин вахтарира ва улихьдин деврариъра, почтальондин пише гизаф жавабдарвал айиб ва, гьаддихъди сабси, гьюрматлуб вуйи.
Советарин Армияйин жергйириъ гъуллугъ апIури, уьлкейин жюрбежюр шагьрарин вузариъ урхури, идарйириъ, мяишатариъ, тешкилатариъ лихурайи бай, чве, аба, мирас ва багахьлу адру хизан ухьухь тек-бирра бихъуб мумкин дайи. Дурарихьан кагъзар гъадагъури, дурарин сагъламвалихъди, яшайишдихъди, апIурайи ляхнарихъди таниш хьувал, тIалабарна игьтияжар аьгъю апIувал – гьарсаб хизандиз аьхю шадвал вуйи.
Гьар йисан июль вазлин кьюбпи элгьет йигъан ихь уьлкейиъ почтайин Йигъ къайд апIури шулу. Почтальон ихь хулариз гьаммишан шадвалин хабрар хурайи кас ву. Ва гъийин йиз макьалайиъ Дербент шагьрин Гьяйдар Аьлиевдин ччвурнахъ хъайи кючейиъ айи кьялан почтайиъ почтальонвалин ляхин апIурайи Галина Ларочкинайихъди таниш хьидихьа.
Почтальонди лихури, Галина Ларочкинайин 20-йистIан артухъ ву. Дугъу чан пишекарвалин вазифйир дюз-дугъривалиинди кIулиз адагъуз жвуван кьувватар сарф апIури, намуслувалиинди зегьмет зигура. Узу Галина Ларочкинайикан газат урхурайидар гъи почтайин ляхниъ духьнайи дигиш’валарихъди таниш апIуб ккун гъапIнийза.
– Галина Тимофеевна, увуз почтальонвалин ляхин фици кьисмат гъабхьну?
– Узу почтайиз ляхниз гъяйиз, Дербент шагьриъ пионерар гьязур апIурайи Хулаъ фортепьянойихъ мукьмар йивуз улупбан дарсар киври гъахьунза. Узу гъурхуб Дербент шагьрин музыкайин мектеб вуйиз. Йиз ляхнин гьякъи цIиб ву кIури, ич директор Эльвира Гельбертовайи Дербент шагьрин кьялан почтайин директор Елена Байрамовайикан узу почтайиз ляхниз кьабул апIуб ккун гъапIнийи. Ва 1999-пи йисхъан мина узу мушваъ ляхин апIураза. Магьа гьамци узуз му ляхин кьисмат гъабхьну. Шагьрин «Мягьял» терефнаъ, Аваиндиъ варитIан аьхю участокар узухь хьайизухь. Ляхнин гъавриъ ади, узу узуз ляхнин программа тешкил апIури гъахьунза. Ва, чIатан гьавйириз дилигди, газатар, журналар, пулин дакьатар хътаувалар ва жара корреспонденцйир кьатIи вуди чан вахтна ва вахтниинди эйсйирихьна рукьурийза.
– Гъи почтайин ляхниъ фицдар дигиш’валар духьна?
– Почтайиъ хайлин дигиш’валар духьна. Йиз зегьметнан ляхнин муддат 1999-пи йислан мина ккебгънайиб вуйиз. Думу вахтарин подпискайин ва гъийин подпискайин кьадар тевиш, аьхю фаркь’вал а. Думуган интернет думукьан жанлуди либхурадайи. Телевизориан саб, кьюб канал улупиш, дурариан анжагъ асас хабрар аьгъю шуйи. Гъи гьарсар касдин хулаъ интернет а, телевизориъ фунуб ккундуш канал улупура. Дюн’яйин тмунуб кIулиан вуйи вари хабрар аьгъю апIуз шулу.
Узу почтайиз ляхниз гъафи вахтна, мушваъ почтальонарди 18 кас лихурайи, хъа гъи 6 кастIан имдарча. Подписчикарин кьадар ва ляхнин гьякъи цIиб гъахьну. Узу апIурайи ляхнин аьхю пай суддин приставарин, сударин, налогар уч апIру гъуллугъарин ва имбу хайлин идарйирин кагъзар пай апIувал ва дурар вахтниинди йишв’ина рукьувал вуйиз.
– Фуну кючйириъ ляхин апIурава, ляхниъ читинвалар алахьури шулвуз?
– Узу гизаф кючйириъ ляхин апIураза. Гагариндин, Мамедбеговдин ччвурнахъ хъайи, Советская ва хайилин жара кючйириъ. Ав, читинваларра алахьури шулиз. Улихьна вари хуларин урнарик почтайин ишкIар кади шуйи, гъи дурара имдар ва кючйирин ччвурарра гьаммишан дигиш апIуру; саспидарин хуларик чпин хуларин нумракьан шулдар. Яшра вуйиз, хъа ляхинра дапIну ккунду. Ихь гьюкуматдин улихь хьайидарин терефнаан ич ляхниз цIибдитIан фикир туврадар.
Улихьна вахтари почтальондин пише варитIан гьюрматлуб вуйи. Ужудар хабрар хуру кIури, почтальон инсанарин арайиъ ккуни хялижв вуйи. Дербент шагьриъ узу аьгъдру кас адар, душваъ дуланмиш шулайи вари агьал-йириз, гьам яшлуйириз ва гьамсана бицIидариз, чпин почтальон ужуди аьгъя. Узу гъуллугъ апIурайи кючйириъ чап апIбан дакьатарин пропаганда гъабхбаъ, газатаризна журналариз ва жара литературайиз подписка апIбан ляхниъ гьар йисан жанлуди иштирак шулаза.
– Чухсагъул, Галина Тимофеевна. Ляхниъ заан хъуркьувалар ишривуз.
