Мялуматар тартиб апIру Региондин центриан мялум гъапIганси, ЕГЭ тувру резервдин йигъари (28-пи, 29-пи июндиъ ва 2-пи июлиъ) кIули гъуху имтигьнарин натижйир ашкар духьна. Дурар муниципалитетарин образованиейин управленйириз хътаъну.
Дагъустандиъ резервдин йигъари урус чIалнаан ЕГЭ тувуз 356 ученик гъафнийи, дурарикан 79 ученикдихьан варитIан асккан балл гъадабгъуз гъабхьундар, хъа 18 ученикди 80-тIан артухъ баллар гъазанмиш гъапIну.
Биологияйиан имтигьяндиз гъафи 218 выпускникдикан 44-ри кьюбар гъадагъну, саркьан выпускникдихьан 80 ва артухъ баллар гъазанмиш апIуз гъабхьундар.
Инглис чIалнаан ЕГЭ-йиз 61 ученик гъафнийи. Дурар вари му имтигьяндиъ тяйин дапIнайи асккан баллилан улдучIвну, мидланра гъайри, 4 выпускникди 80 ва артухъ баллар гъадагъну.
Химияйиан имтигьян туву 217 ученикдикан 72-рихьан асккан балл гъадабгъуз гъабхьундар, 4 выпускникди имтигьян 80 ва артухъ баллариз тувну.
Тарихнан дарснаан имтигьян тувуз гъафи 96 выпускникдиканра 22-ри асккан баллкьан гъазанмиш гъапIундар, хъа 80 ва думутIан артухъ баллар гъадагъу выпускникарра саркьан адайи.
Обществознаниейиан имтигьяндиз 74 ученик гъафну, дурарикан 28 выпускникдихьан ЕГЭ тувуз гъабхьундар.
Математикайин ЕГЭ туву 64 выпускникдикан 15 выпускникдиз кьюбар гъахьну. 80-рихьна ва думутIан артухъ баллар сарихьанра гъазанмиш апIуз гъабхьундар.
Физикайиан вуйи имтигьяндиъ 55 выпускник иштирак гъахьну, дурарин арайианра 14 касдихьан имтигьян затра тувуз гъабхьундайи, хъа 4 выпускникди физикайин ЕГЭ-йиан 80 ва артухъ баллар гъазанмиш гъапIну.
Информатикайиан ЕГЭ 17 выпускникди тувну, дурарихьан варидарихьан асккан баллилан улдучIвуз гъабхьну, мидланра гъайри, 5 выпускникди имтигьян 80 баллиз тувну.
Литературайиан имтигьяндиз гъафи 15 выпускникдикан 3-рихьан думу тувуз гъабхьундар. 80 баллтIан артухъ гъазанмиш гъапIур сар кастIан дайи.
Географияйиан имтигьяндиъ иштирак гъахьир сар выпускник ву. Думу асккан баллилан улдучIвну, амма натижйир 80 баллихьна за апIуз гъабхьундар.
Резервдин йигъари жюрбежюр предметариан кIули гъушу имтигьнариъ 100 балл гъазанмиш гъапIу саркьан выпускник адар. Зиихъ улупнайи натижйириан рябкъюрайиганси, варитIан читиндар биологияйин, химияйин, обществознаниейин, математикайин ва физикайин имтигьнар гъахьну. Имтигьянарин натижйирихъди выпускникарихьан муниципалитетарин образованиейин управленйириъ вая образованиейин идарйириъ таниш хьуз шулу.
