Гьюкуматдин Табасаран театрин гьюрматлу тамашичйир!
23-пи апрелиъ Мягьячгъалайиъ Къумугъ театрин сягьнайиин Табасаран театри нубатнан ражну вуди чан «Гъала» кIуру спектакль улупиди. Спектакль гьадму йигъари Дагъустандиъ кIули гъябгъру милли театрарин фестивалихъди аьлакьалу вуди улупурайиб ву. Фестивалиъ ихь республикайин ва Каспий гьюлин гъирагъарихъ ерлешмиш духьнайи жара гьюкуматарин милли театрар иштирак хьиди.

«Гъала» спектакль Ю. Базутаевдин гьадму ччвур али пьесайин бинайиинди дивнайиб ву. Автори му пьесара ихь халкьдин «Ургур чвуччвун ва сар чуччун гъала» кIуру нагълин бинайиинди дибикIна.

Нагълиъ, Надир-шагьдин кьушмарин башчийиин юкIв улубкьу чуччу чан гъардшарин гапрар, кьилан шид убзну, чIур гъапIну кIури, мялум апIура. Халкьди чан нагълиъ ургур чвуччвун чи тахсиркар апIура.

Хъа автори чан пьесайиъ, ваъ, чуччу чвйир масу тувуб мумкин дар, кIура. Пьесайин автори ихь халкьдин арайиъ думу шуран гьякьнаан гъубзнайи аваза анжагъ шлин-вуш футна вуди гьисаб апIура. Ва дугъан гьадму фикир Табасаран театрин коллективди театрин сягьнайиина адабгъну.

Спектаклиз табасаран чIал аьгъдрударихьанра лигуз шулу, фицики, тамашичйириз вари спектакль ттархьну урус чIалназра таржума апIура.

Спектакль йигъну сяаьт шубубди ккебгъди.