Зегьмет ккуни касдихьан саб вахтнара ляхин дарди гъузуз шулдар, ва дугъу, наан ашра, жвуван яшайишра ккабалгуру, имбударизра хайир хуру. Ляхник кадарди ктисуз даршлу гьаму жюрейин касар гьарсариз таниш ву, фицики фуну коллективдиъра асас ляхин гьадрари тамам апIуру. Урусатдин жюрбежюр регионариъ рукьан рякъярин цирклиъ яркьуди машгьур кас, 2018-2019-пи йисавнри Крымдин гъяд тикмиш апIбак лайикьлу пай киву Юрин Къурбанов гьацдар инсанарикан ву.
Юрин Къурбанов Табасаран райондин СиртIич гъулаъ 1968-пи йисан 7-пи майдиъ Балабег ва Айханум Къурбановарин фягьла хизандиъ бабкан гъахьну.
Байвахтна Юрин адашдихъди кми-кмиди Дербентдиз гъягъюри гъахьну. Гьар ражари бицIи Юрин шагьрин рукьан рякъюн вокзлихъна гъягъюйи ва аьхю ашкьниинди рукьан рякъюз лигури, фици рельсарилантина вагъунар гъягъюруш, гюзет апIури, фуну кьувватну дурар гьяракатнаъ ирчраз, ашкар апIуз чарйир зигури шуйи. Ригъун нурарикк рапрапар апIурайи рельсари, кум хътибчури, багахь гъюбахъ аьхю шулайи поездди, ярхла гъягъбахъ ккури шулайи рукьан рякъю балин фикрар гьарган чпихьна зигуйи, фагьум фициб-вуш аьламатнан сюгьриъ ипуйи. Гьадмуган Юринди гъюзимбу уьмур рукьан рякъюхъди сатIи апIуз ижми кьаст гъапIнийи. Ва 1988-пи йисан, СиртIчарин кьялан мектеб ккудубкIиган, жигьил, артухъ фикрар дарапIди, Волгограддиъ айи рукьан рякъярин техникумдик урхуз кучIвнийи.
Техникум уьру дипломдиинди ккудубкIну, Юрин Къурбановди чан байвахтнан арзу хиял тамам гъапIнийи – думу Волгоград шагьрин 152-пи нумрайин рукьан рякъюн машинный станцияйиъ (ПМС) рукьан рякъ’ин сифте мастерди, хъасин участокдин начальникди, аьхирки директорин заместителди гъилихну. ЮкIв хъайи ляхин заан дережайиъди кIулиз адабгъбан ва имбударин терефнаан саб тягьнара ктарди тамам апIбан бадали чав техникумдиъ гъадагъу аьгъювалар чIяаьн даруб гьисс апIури, Юрин Къурбанов сацIиб вахтналан заочно къайдайиинди Москвайин рукьан рякъярин институтдик (МИИТ) урхуз кучIвру.
Сумчурна кьюд йисандин арайиъ Юрин Къурбанов аьхю уьлкейин жюрбежюр регионариъ гъилихну ва гизаф рякъяр тикмиш гъапIну. Волгоград, Казань, Ростов, Саратов, Москва, Урал, Керчь – гьарсаб гьаму шагьриъ рукьан рякъярин циркил артмиш апIбак дугъу лайикьлу пай кивну. Мисалназ, Юрин Балабеговичди 2015-пи йисан, Казань шагьриъ 33-пи мостопоезддин начальникдин вазифйир тамам апIури, шагьрин рякъярин бицIи гьялкъа (Казанское малое кольцо) тикмиш апIбаъ иштираквал гъапIну. Сикинсуз 1990-пи йисари, Чечен республикайиъ дявдин гьяракатарин натижайиъ рукьан рякъяр чIур гъахьиган, дидин гъвалхъантина гъябгъру рукьан рякъ тикмиш апIуз кюмек тувну.
Марцци зегьмет зигбаз лигну, табасаран тикилишчи хайлин рукьан рякъюн цирклин пешкешариинди, гьюрматнан грамотйириинди лишанлу гъапIну. Юрин Балабеговичдиз варитIан багьайиндар чаз уьлкейин Президент В. Путинди туву «Крымдин мост тикмиш апIбаз лигну» кIваин гъибтбан медаль ва дидихьна вуйи грамота ву. Гьаму важиблу гьядисайилан учу сюгьбатра ккебгънийча.
«Узу 2018-пи йисан Керчдин полуостров ва Тамань остров сатIи апIбан бадали Крымдин гъяд тикмиш апIуз гьаънийи. Крымдин гъяд кьюб, гъушади гъягъюрайи гъядарикан ибарат ву – машинар гъягъру ва рукьан рякъюн гъядарикан. Рукьан рякъюн гъяд, машинар гъягъру гъядун кьяляхъ, 2018-пи йисан тикмиш апIуз хъюгънийи. Узуз душваъ лихуз лап маракьлуди вуйзуз, фицики сабпи ражари вуди гьюлиин объектар тикмиш апIувал алабхъунзуз. Керчдиъ «ТЮС-Путь» тешкилатдин кьюбпи участокдин начальникди лихури, йиз гъарашугъарихъди къанна ургуб вазлин арайиъ 19 км ярхишнан кьюб рякъ али (двухпутка) рукьан рякъ тикмиш гъапIунча. Жин апIдарза, гьавйирин дараскьал шараитариъди гъилихунча – убцру ригъуккди, кьюрдун вахтна учIру аязнаккди, чвулин учIвру микIар хъивруган, гьюлиин тIурфан алиганра кмиди. Ужудар гьавйириз ккилигуз вахт адайи – объект тяйин дапIнайи вахтназ – 2019-пи йисан аьхириз ккудубкIну ккундийи.
Рукьан рякъ тикмиш апIури, йигъ-йишв дарпиди, йирхьуб бригада лихури гъахьнийча. Узуз гизафси маркьлуб гъядун зиин 35 метр ягълишин али чарх (арка) тикмиш апIувал гъабхьунзуз – дидин исккан аьхю гимйирихьан ккудучIвуз шулу.
Учу тикмиш гъапIу, кьюбиб терефариздира гъябгъру кьюб рякъ али рукьан рякъ ачмиш апIуз 2019-пи йисан декабрин аьхириъ Урусатдин Президент Владимир Путин гъафнийи, ва гьадмуган медалра тувнийзуз», – ктибтнийи Юрин Балабеговичди му важиблу тикилишдикан.
Гъи Юрин Къурбанов Волгоград шагьриъ яшамиш шула ва «Трансжелдорстрой» тешкилатдиъ лихура. Дугъу чан хиликк ккайи пишекрарихъди сад йисандин арайиъ 44 км манзил айи рукьан рякъ тикмиш гъапIну. «Волгоград шагьрин Максимка микрорайондиан Тингута станцияйиз анжагъ кьюб рельснакан ибарат вуйи саб рякътIан адайи. Дидиз гъушади сабсан рякъ гъапIунча, ва гьамус поезддарихьан кьюбиб терефариздира гъягъюз шулу. Му рякъ я август, ясана сентябрь вазли ачмиш апIиди», – ктибтнийи йиз сюгьбатчийи.
Чан уьмрин юлдаш, СиртIич гъул’ан вуйи Пакизат Аьлиплатовнайихъди, Юрин Къурбановди кьюр велед аргъаж гъапIну. Маратди чан уьмур адаш лихурайи цирклихъди сатIи гъапIну – думу трамвайдин машинист ву. Риш, Диана, мединститутдиъ урхура.
Ляхнин хъуркьуваларин сир фу вуяв, кIури, узу гьерхиган, Юрин Къурбановди жикъиди «абйир-бабари туву ужуб тербия», гъапнийи. «Ляхнихьна вуйи аьшкь, гьякьлувал, туву гаф тамам апIувал – хасиятнан гьаму вари лишнар узуз, ифдикди, йиз абайихьан, Ибрагьим Ханмягьямадовдихьан, гъафидар вузуз. Абайи улупунзуз инсанарихъди дугъри аьлакьйир уьрхюзра, намуслуди жвуван ляхин кIулиз адабгъузра. Ва гьаму лишнариз ва аьгъювалариз гюре гъи йиз гъарашугъарин терефнаан гьюрматра-гьязатра азуз», – къайд гъапIнийи дугъу.
«Йиз веледаризра кIури шулза, ихь газат урхру жигьил наслихьнара илтIикIураза: уьмриъ хъуркьувалар гъадагъуз, заан натижйирихъна гъюз ккундуш, гьякьлудар, дугъридар йихьай, дюзвалин гъаразнаъ йихьай, жвуву туву гаф чарасуз тама апIинай, хъасин нач дархьбан бадали. Жвуван абйир-бабариз гьюрмат апIинай – миди ичв инсанвалра улупуру, ва, яш гъабхьиган, учвухьнара жигьил наслин тялукь янашмиш’вал арайиз хуру. Ва варитIан асасуб – кIул зади лицуз шлуганси, уьмур хъапIай» – гьаму маракьлу гафариинди Юрин Балабеговичди ич сюгьбатнан натижа гъивнийи.
