Улихьна йигъари Хив райондиъ Урусатдин машгьур гимнастка, 2010-пи йисандин арайиъ спортивный гимнастикайиан Урусатдин, Европайин ва дюн;яйинра чемпион, 2013-пи йисан Казань шагьриъ кIули гъушу вари уьлкейин Хьадан Универсиадайин гъалибчи, Урусатдиъ дережайиъди кIули гъуху хайлин талитарин чемпион Татьяна Набиева къаршуламиш апIбахъди аьлакьалу шадлугъар къайд гъапIну. Къайд апIурза, Татьяна Набиевайин адаш Хив райондин Гъвандикк гъулан вакил ву.
Шадлугъар райондин глава Ярмет Ярметовдин регьберваликкди кIули гъушну.
Райондин сяргьятар ккергъру йишв’ин дивнайи урнарин тагъдин (аркайин) улихь спортсменка уьлкейиъ кьабул дапIнайи саягъниинди ульна кьил хьади кьабул дапIну, дуфнайи хялар Хив Гъалибвалин паркдиз дявдин майднариъ жямяаьтлугъ азадвал ва намус бадали чпин жанар фида гъапIу ватанагьлийирин гьюрмат уьбхюз уч гъахьну.
Хъасин спортсменка ЦТКНР-йиъ табасаранлуйирин аьдатарихъди ва тарихдихъди таниш гъапIну. Дугъаз райондин культурайин гъуллугъчйири, дуркьарихъ табасаран халачийик гугар кахьузра улупну.
Асас мярака Хив спорткомплексдиъ кIули гъубшну. Мушваъ чемпион шурахъди таниш хьуз райондин живан спортсменарра уч гъахьну.
Мярака ачмиш апIури, Хив райондин глава Ярмет Ярметовди, ватанагьлийири фунуб цирклиъра хъуркьувалар гъазанмиш апIбиин чпи кьадарсуз шад вуйивал субут гъапIну.
«Жвуван ватанагьлийири вари уьлкейин дережайиъди хъуркьувалар гъазанмиш апIувал — аьхю хъуркьувал ву.
Йишвариин спорт артмиш апIбаз учу дикъат фикир туврача. Жигьилариз спортдин рякъюъ лазим шараитар яратмиш апIбан метлебниинди вари мумкинвалар сарф апIурача. Учу фунуб жюрейинра ужувлан серенжемарин тереф уьбхюз гьязур вуча, — гъапну дугъу.
Дупну ккундуки, Татьяна Набиевайин азгар хиялра тамам гъабхьну — дугъаз райондиъ чан багахьлуйирра гъидихъну. Думу Гъвандккарин гъулаъ яшамиш шулайи чан эме Энфизат набиевайиз хялишра гъахьну.
Машгьур спортсменкайиз ватандин терефнаан халачира бахиш гъапIну. Татьяна Набиевайи райондин кIулиъ айидариз ва Хив райондин жямяаьтдиз учв мициб ккунивалиинди къаршуламиш апIбаз лигну, чухсагъул мялум гъапIну.
