Жвилли шрифтди фу жин апIура?

 

Жиниб дар, фициб документдиъ вая объявлениейиъ сабпи нубатнаъди чIатхуди дибикIнайиб урхуз мажбур шулахьу, хъа жвиллиди, урхуз цIиб читинди дибикIнайибдиз думукьан фикир тутрувди, лазим дарубси гьисаб дапIну, дурурхди гъибтрахьа. Му ихь аьхю гъалатI ву. Саспиган варитIан асас мяна гьадму жвиллиди дибикIнайибдиъ хьуз мумкин ву.

 

Банкдин ясана жара жюрбежюр йикьрар йитIбан документариъ жвиллиди бикIувал ишлетмиш апIбиинди, муштари алдатмиш апIуб мумкин ву. Фицики муштарийи, дурхну ккуни жвиллиди дибикIнайибдиз асас фикир тутрувди, банкдин гъуллугъчийиин хъугъ’вал дапIну, документариин къул зигуру. Хъа му дугъан аьхю гъалатI ву. Гьаз гъапиш, жвиллиди дибикIнайибдик чарасуз лазим вуйи, мажбур вуди дурхну ккуни пунктар кади хьуб мумкин ву. Мисалназ, думу пунктарик картайихъан пул хътабгъбан, карта ишлетмиш ва гьацдар жара ляхнар апIруган, процентар ктабгъбакан дибикIнади хьуб мумкин ву.
Эвелиан уччвуди гъяркъю йикьрарин шартIар натижайиъ ужудар шулдар. Хъа документдихъ ичв къул дизигнайивализ лигну, сарун учвхьан наразивалра улупуз шулдар. Фицики, гьелелиг документариъ жвиллиди бикIбувал къанундиинди албагнадар. Гьаддиз дици бикIуз ихтияр а.
Гьаци вуйивализ лигну, думу банкдин тахсир шуладар, хъа ичв тахсир шула. Гьаз гъапиш банкдин докумантарихъ къул зигру вахтна, фукьан вахт гъябгъюрушра дилигди, тIагъру дарапIди, чарасуз вуди жвиллиди дибикIнайиб дурхну ккунду. Эгер учву гъавриъ адрахъуб гъубзраш, банкдин гъуллугъчийикан учву гъавриъ тIауб ккун апIинай. Ичв дакьатарихьна жавабдарвалиинди янашмиш йихьай!

 

Фици дюзди кредит гъадабгъуру?

 

Жюрбежюр метлебариз ишлетмиш апIру кредит – му ухдианмина кIваъ айи хиял кIулиз адабгъуз вая кьаназ гъибтуз даршлу мутму масу гъадабгъуз мумкинвал тувру гъулай ва рягьти къарар ву. Банкдиан кредит гъадабгъувал – буржназ пул гъадабгъбан варитIан хатIасуз жюре ву, гьаз гъапиш банкарин ляхин гьюкуматди мюгькамди албагура. Учвуз вахтниинди гъапIу кюмек учвхьан гъабхуз удудукьру гъагъназ илтIитIибкIбан бадали, кредит гъадабгъайиз улихьна гьапIну ккундуш, магьа швнуб-саб метлеблу насигьятар.

Сабпиб, учвуз айи мумкниваларин дережа тяйин апIинай. Учву гьамусдиз гъадагънайи кредитариан ва цIийиди гъадабгъу кредитдиан гьар вазли сатIиди туврайи харжарин кьадар хизандин гъазанждин 30-40%-тIан артухъ дубхьну ккундар.
Кьюбпиб, жюрбежюр банкарин теклифар тевну, процентарин ставкайин ва думу ктипбан муддатнан, гьадму гьисабнаан гьар вазли апIурайи харжарин, гьякьнаан учвуз варитIан гъулай, ужудар шартIар гъядягъяй.
Шубубпиб, йикьрар йитIайиз улихьна, учву кадабгънайи банк лихурайи кредитдин тешкилатарин сиягьнак каш, инанмиш йихьай. Думу, мисалназ, Урусатдин Банкдин сайтдиъ ахтармиш апIуз шулу.

Юкьубпиб, ужуб хайир хру шартIар айи теклифар хил’ан идидирчбан бадали, банкдин рекламайин гюзет апIури гъибтай, амма дикъат тувай, гьякьикьи ставка рекламайиъ мялум дапIнайибтIан зади хьуб мумкин ву.
Хьубпиб, аьхю кьимат айи мутму, квартира вая автомобиль масу гъадабгъуз буржназ пул гъадабгъруган, метлебнан кредитариз лигай, дурариан ставкйир, аьдат вуйиганси, исди шулу.

Йирхьубпиб, гьякъи кьяляхъ тувбаан учвуз айи мумкинвалар тасдикь апIбан бадали, улихь ккимиди документар гьязур апIинай: гъазанжар гъадагъбакан справка, хуларин ва автомобилин хусусивалин гьякьнаан шагьадатнама ва гьацдар жарадар. Мицдар документарин сиягь банкдин сайтдиъ вая отделениейиъ аьгъю апIуз шулу. Банкдиз учву фукьан ихтибарлу муштариси гъяркъиш, дидин пулра учвуз гьадмукьан ужузди дийибгъиди.
Ургубпиб, банкари йитIурайи йикьрарик кми-кмиди учву страхование оформить апIуз мажбур апIурайи пункт капIри шулу, мисалназ, уьмрин ва сагъламвалин, вая ляхин дубгуз хатIа айивалин. Буржназ пул гъадабгъурайири страхование апIуз разивал тувували банкдиз кредитдиан учвуз процентарин хайирлу ставка айи теклиф апIуз мумкинвал тувру, амма кIваинди гъибтай, му страхование гьаммишан мажбури вуди дапIну ккуниб дар, гьаддиз дидхьан отказ апIузра шулучвхьан, хъа, мидихъди сабси, кредитдин ставка зади хьуб мумкин ву. Страхование апIбан жюрйирикан FINCULT.INFO сайтдиъ тамамди мялуматар гъадагъуз шулу.

Миржибпиб, кредитдин тамам кьимат йитIнайи йикьрарин арчулну заан мурччваъ дюз мурччварин рамкайиъ улупнади ккунду.
Буржназ пул, фикир дапIну, гъадабгъай!