2021-пи йисан 22-пи августдиъ гьюкуматдин пайдгъин Йигъаз бахш дапIнайи серенжемдиъ Урусатдин Президент Владимир Путинди Урусатдин вари пенсионерариз саб ражари 10 агъзур манат тувувалин теклиф дивну.
Владимир Путинди «Саб вуйи Урусат» партияйин вакиларихъди вуйи гюрюшдиъ къайд гъапIганси, инфляцияйихъ хъуркьбан бадали, гьар йисан пенсия сад агъзур манатдин за апIура, амма гьамусяаьт инфляцияйин дережа за шула, пенсионерариз агъзур манатдикан фукIара гъубзрадар.
Федерацияйин Советдин яшайишдин политикайин месэлйириз лигру комитетдин председатель Валерий Рязанскийди думу теклифнакан чан фикрар ачухъ гъапIну.
«Урусатдиъ 40 миллиондиинакьан пенсионерариз страховой пенсия гъюра – дурариз 400 миллиарддиина пул лазим ву, социальный пенсия 3,5 миллион касдиз гъюра – дураризра 35 миллиард манат лазим хьибди. Военный пенсионерарра а, дурариз Президентди 15 агъзур манат тувувалин теклиф дивна. Военный пенсионерарин кьадарра 2 миллиондиинакьан ву. Пенсионерариз саб ражари туврайи гьякъийиз уьмуми гьисабниинди 500 миллиард манат лазим ву», – гъапну дугъу.
Пул 2021-пи йисан 31-пи августдиз Урусатдин Пенсйирин фонднаан пенсия туврайи, гьаммишан Урусатдиъ яшамиш шулайи ватандашариз тувди. Думу сентябрин вазлитIан ухди дарди, Государствойин Думайиз сечкйир гъахбан кьяляхъ гъибди. ПФР-из вари пенсионерарикан мялуматар а, думу пул пенсияйихъди сабси тувди.
24-пи августдиъ Владимир Путинди гьаму йисан сентябрин вазли вари пенсионерариз 10 агъзур манат тувбан гьякьнаан вуйи Указдиин къулра гъизигну.
***
Гюлханум Мягьямедова, пенсионер, 63 йис:
– Урусатдин Президент Владимир Путинди гьаму читин вахтна пенсионерариканра гьархну адрувализ чухсагъул мялум апIураза. Къайд апIувал лазим вуки, аьхиримжи вахтна уьлин, ипIру-убхъру сурсатарин кьиматар за духьна. Гизаф йисари дилихну, зегьметнан ужуб стаж айи пенсионерариз гьацира ужуб пенсия тувра, хъа узуз гъюрайиб 9 агъзурна 700 манат ву. Думу кьадар, гьелбетда, лап цIиб ву. Пенсия адабгъиган, тукандиз гъягъюри шулза, фу масу гъадабгъну, фу гъибтруш мюгьтал шулу. Гьаддиз узу, аьлава гъазанж ктапIбан бадали, кафейиъ ляхин апIури шулза. Гьаци дарш, 9 агъзур манатдиинди мадар апIуз шулдар. Аптекайиъ дармнар масу гъадагъуз, яшамиш шулайи хуларин коммунальный гъуллугъарихъан гьякъи тувуз, сумчриз-саламдиз, гъягъру-гъюру йишвариз пенсия гьубкIрадар. Хъа сагъ’вал гъабхьиш, имбуну ляхнар дюз апIуз шлудар ву.
Сиражудин Мягьрамов, пенсионер, 76 йис:
– Узу яш дубхьнайи инсан вуза, пенсияйилан савайи йиз хилиз гъюру гъазанж адар. Владимир Путинди пенсионерариз пул тувбан гьякьнаан Указдиин къул гъзигувалиин шад гъахьунза. Хъа вушра, думу гьаму сентябрин вазлиъ кIули гъахурайи сечкйирин улихь пенсионерарин улар йитIуз дапIнайи ляхинси гьугъубжвуразуз. Гьамусдин девриъ сагъ’вал хъайи жигьилари чпин мадар апIуру, хъа сагъ’вал адру инвалидариз 10 агъзур манатдикан дармнар масу гъадагъуз вушра кюмек хьибди. Абйир-бабар хътрувалин пенсия гъюрайидаризра гьаму пул ккубкьрайивалиин шад вуза. Йиз гъуншдиъ сар дишагьлийи (жилир гъакIну) 3 велед сарди тербияламиш апIура. БицIидариз харжар гизаф гъягъюру. Узуз туврайи 10 агъзур манатдикантIан, гьадрариз туврайи пуликан рази вуза.
