Гьаму улихьнаси вахтназ вуди РД-йин Главайин вазифйир тамам апIурайи Сергей Меликовдин регьбервали-ккди ва тялукь министерствйирин, идарйирин вакиларин иштирак’валиинди республикайин образованиейин тешкилатар цIийи 2021-2022-пи урхбан йисахьна гьязур хьпан ва дурарин хатIасузвал тямин апIбан месэлйириз бахш дапIнайи яркьу заседание гъабхьну.
Региондин кIулиъ айири чан удучIвну улхбаъ къайд гъапIганси, 1-пи сентябриъ республикайиъ аьгъюваларин Йигъаз бахш дапIнайи саб жерге жямяаьтлугъ серенжемар гъахбанди ву. Дурар къайдалуди, хатIасузвал уьбхюри кIули гъахбан бадали, улихь дивнайи вазифйир хъуркьувалиинди тамам апIбаз асас фикир тувну ккунду.
Аьгъюваларин Йигъан хатIасузвал тямин апIбан бадали, улихь ккимиди фицдар уьлчмйир кьабул апIураш, Дагъустандин айтIан ляхнарин министр Аьбдурашид Мягьямедовди ва Росгвардияйин РД-йиъ айи Управлениейин начальник Мягьямед Баачиловди чпин удучIвну улхбариъ мялум гъапIну.
Доклад гъурхдари къайд гъапIганси, урхбан йис ккебгъайиз улихьна вари йишвариъ дараматарин хатIасузвал, лазим вуйи уьрхбан алатарихъди тяминвал (видеойин гюзчивал, гюзчивалинна деетбан къайда тешкил апIувал, ишара апIбан кнопка айивал ва гъирагъ вуйибси бару илтIибкIну аш-адарш) ахтармиш гъапIну.
Аьбдурашид Мягьяме-довди мялум гъапIганси, 1-пи сентябриъ республикайин айтIан ляхнарин органарин 10 агъзур гъуллугъчйири ва Росгвардияйин кьушмарин 250 дявдин гъуллугъчйири, ижми къайдайиъди образованиейин вари дараматарин гюзчивал гъабхури, хатIасузвал тямин апIиди.
Мектебар ва бицIидарин багъар хатIасузвал уьбхру алатарихъди тямин апIбан гьякьнаан улхури, Сергей Меликовди тазади тикмиш апIурайи мектебариъ ва багъариъ, вари гъирагъ вуйибси бару илтIибкIну, аварийный аьлава удучIвру йишвар ади хьувал чарасуз лазим вуйиваликан гъапну.
Республикайин мектебар улубкьурайин цIийи урхбан йисахьна фици гьязур духьнаш, хатIасузвалин вари алатарихъди фукьан мектебар тямин дапIнаш, вахтназ вуди РД-йин илимдин ва образованиейин министрин вазифйир тамам апIурайи Ягь’я Бучаевди мялум гъапIну. Дугъан гафариинди, гъи аьхюну пай мектебариъ хатIасузвал уьбхбан лазим вуйи вари алатар а. Росгвардияйин РД-йиъ айи Управлениейихъди сатIиди образованиейин идарйириъ хатIасузвал тямин апIбан ва гюзчивал гъабхбан бадали, 2022-пи йисаз лазим вуйи дакьатарин кьадар тяйин апIура.
Заседаниейин аьхириъ образованиейин идарйир террориствалин гьяракатарихьан уьрхювалин гьякьнаан аьлава табшуругъар тувнийи.
